Innuttaasut naapinnissaannut Naalakkersuisut sapiissuseqanngitsut

All: Sofia Geisler, Inuit Ataqatigiit, Inuussutissarsiornermut Aatsitassanullu Ataatsimiititaliaq, siul.tull.

Innuttaasut naapinnissaannut Naalakkersuisut sapiissuseqanngitsut

Innuttaasunik Kujataani ataatsimiisitsinissanut najuunniaratik Naalakkersuisut aalajangerput. Aalajangerput allaffimminniillutik qarasaasiakkut malinnaaniarlutik. Naalakkersuisut atorfilittatik suliffeqarfillu uranimik akulinnik aatsitassarsiornermik ingerlatserusuttoq aallartissavaat. Takku oqaluttuartussanngortinneqarput aatsitassarsiorfimmik imaattumik Kutaani nunamik ullumikkut ittumut uteqqinngisaannarnissatsinnik malitseqartussamik sooq pilersitsiniarnerlutik Naalakkersuisut kissaateqarnersut.

Atorfilittat suliffeqarfillu pineqartoq innuttaasunik naapitsinerminni aallaavigisassaat tassaavoq Naalakkersuisut siunertaat, tassalu Kuannersuarni aatsitassarsiorfimmik pilersitsisoqassasoq. Atorfilittat suliffeqarfiullu pineqartup innuttaasunik ataatsimiisitsinermi Naalakkersuisut sinniisuuffigissavaat. Atorfilittat Naalakkersuisutuulli akisussaasunngortinneqarput.

Tamanna pisussanngorpq innuttaasunik naapitsinissaminnut Naalakkersuisut sapiissuseqanngimmata. Inuit isaasigut isigalugit naapinnissaannut, isummaminnik illersuinissaminnut apeqqutinullu apeqqusiisunut akinissaminnut.

Naalakkersuisut: Inuit aatsitassarsiortoqalissappat toqqaannartumik pitsaasumik pitsaanngitsumillu eqqorneqartussat kiinnerfigalugit naapinnissaat kissaatiginngilarsi. Sapiissusermik takutsitsinngilasi siunertassinnik illersuinissassinnut. Takutitarsi tassaavoq innuttaasut isumaat oqaasissaallu annerusumik soqutiginngikkisi. Tassalu innuttaasut isumaat oqaasissaallu pingaarterujussuanngikkisi.

Taamaattumik Kujataani innuttaasut akueriinnartariaqarpaat atorfilittat naapinnissaat, atorfilittallu taakku ilissinnik illersuisunngortinneqassapput. Suliffeqarfik naapissavaat Kuannersuarni aatsitassarsiorfimmik pilersitsisoqarneratigut suut tamarmik pitsaasuinnarmik kinguneqarumaarnerannik maannamut neriorsuisut oqariartortullu.

Ilanngullugu eqqaasitsissutigeqqissavarput tusarniaanermut piffissarititaasoq sivitsorneqartussaammat Naalakkersuisut ataatsimiinnermut pineqartunut peqataasinnaanngippata. Taamaattumik Naalakkersuisut peqataajumanatik nalunaarnerat tusarniaanerup sivitsoqarnissaanik malitseqassasoq naatsorsuutigaarput. [1]

Taamaattorli suli pitsaanerusumik iliortoqassaaq, suliniut illersorneqarsinnaanngitsoq, inuiannik toqqissisimatitsinanilu avissaartutsitseqisoq unitsinneqarpat.


[1] Regelsæt database (inatsisit.gl), §87a, imm. 3

DEL:

Share on facebook
Del på Facebook
Share on twitter
Del på Twitter
Share on linkedin
Del på Linkdin
Share on email
Del på Mail

Skriv en kommentar

Scroll to Top

Kommuninut qiningassanngortittut allattorsimaffiat