Nipisattassat qaffanneqarnissaanik Naalakkersuisut 12. Maj 2020 aalajangernerannut atatillugu Naalakkersuisut Siulittaasuata suliami peqataasinnaaneranut atatillugu apeqqusiineq tunngavissaqarsimavoq
Tassami 3. juni 2020 Qanoruumut Naalakkersuisut Siulittaasuata nammineerluni uppernarsarpaa angallaminik attartortitsisimanermigut nipisanniarnermut attuumassuteqarluni aammalu tamanna nammineq qanigisamilu isertitsissutigisimagaat.
Apeqquserneqarsinnaavoq 27.000 koruunit ikittuararsuartut oqaatigineqarneri, uanili pineqartoq pingaarnerpaaq tassaavoq apeqqut pingaarutilerujussuaq assersuutigalugu qinikkatut inissisimanermi inatsisiliussaasimasut tunngavigalugit pinngitsoortitassaq. Inussiarnersumillu innersuussutigissavarput; Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. Juni 1994-imeersoq.
Qanoq attuumassuteqarnini oqaluttuarinngikkuniuk aammalu nipisattassat qaffanneqarnissaannik aalajangiiniarnermi peqataaniarani ini qimanngikkuniuk imaannaanngitsumik inissisimalersinnaanini Naalakkersuisut Siulittaasuata ilisimasussaasimagaluarpaa.
Pineqartumut tunngatillugu oqaaseq unnerluutiginninneq Inuit Ataqatigiinniit atorsimanngisaannarparput, kissaatigisimavarpulli Naalakkersuisut Siulittaasuata nammineerluni innuttaasunut oqaluttuarissagaa nammineerluni tallimanngorneq 29. Maj 2020 partiit gangiani oqaluttuarisani qanoq tunuliaqutaqarnersoq.
Nipisattassat qaffallugit Naalakkersuisut 12. Maj 2020 aalajangiineranni Naalakkersuisut Siulittaasuat peqataasimasoq ataatsimiinnerup imaqarniliarinerani https://naalakkersuisut.gl/kl-GL/Naalakkersuisut/Moeder-for-Naalakkersuisut/Meeting-Records/2020/05/12_05_20 naqissuserneqarpoq, soorlulu Naalakkersuisut 25. Maj 2020 tusagassiuutinut nalunaarumminni https://naalakkersuisut.gl/kl-GL/Naalakkersuisut/Pisut/2020/05/2505_Dementi naqissuseraat pisassiissutinik aalajangersaanermi Naalakkersuisut tamarmiullutik aalajangersaasimasut.
Suliami peqataasinnaannginnermut peqataasinnaanermulluunniit inatsimmik Naalakkersuisut Siulittaasuata paasinninnera aalajangiusimasaalu tunuliaqutsernerlugu Siumut, Demokraatit kiisalu Nunatta Qitornaasa innuttaasunut oqaatigisariaqarpaat.
Inuulluaqqusilluta
Inuit Ataqatigiit Inatsisartuni