Tamatta pisussaaffeqarpugut – innuttaasut peqatigalugit

Tasiilami pisut alianartut takutippaat annertuumik suliassaqartugut. Inoqatigut nunami sumiikkaluarpataluunniit ajunnginnerpaamik sunniuteqarluartumillu iliuuseqartariaqarpugut.

Tamatta nunaqqataasugut qanittukkut alianartumik eqqugaavugut. Ilaqutaasunut ikinngutaasunullu misiginneqataangaarluta piffissami ingerlasumi ajunnginnerpaamik kissaappagut. Maluginiagarparalu uani pisumi nunaqqatigiit imminnut ikorfartoqatigiinnermik qanilaarnermillu takutitsinerat. Malugaaralu maannangaaq piaartumik nutaajusumillu iliuuseqartoqartariaqalersoq.

Naak imminortarnermut imigassartornermullu pinaveersaartitsiniarneq, paasissutissiisarneq isumaginninnikkullu iliuutsit pioreeraluartut, Tasiilami pisut takutippaat maanna piaartumik sunniutilimmillu aaqqiisariaqalersugut.

Nutaamillu siunissami ataavartumik aaqqiisoqassappat innuttaasut peqataanissaat namminneerlutillu kajumissusertik atorlugu suleqataanissaat kaammattuutigerusupparput, pisariaqavimmat sunniutilimmik allannguisoqassappat. Pingaartumik imigassap matuneqarnissaa pillugu apeqqummut. Matusisoqassappammi nunaqqatigiit namminneerlutik ataatsimoorlutik kissaatigisariaqarpaat.

Tunumi inuussutissarsiornikkut piorsaasariaqarpugut, aalisakkerivimmik pilersitsisariaqarpugut suliffissanik isumannaarinnittussamik. Takornariaqarnikkut piorsaasariaqarpugut illoqarfiup ineriartorluarnissaanik siunertalimmik.

Naalakkersuisooqatigiinnermilu isumaqatigiissummi allaqqasutuut Tasiilami ilinniarfimmik pilersitsisoqarnissaata piviusunngulertornissaa sulissutigipallattariaqarparput. Inuusuttut illoqarfimminni periarfissilluarumallugit siunissamilu neriunnermik nukittorsaataasussamik qulakkeerinnittussamik.

 

Iddimanngiiu Bianco

Inuit Ataqatigiit