Siumup takutippaa asuli utoqqaat qineqqusaarutigisimallugit

Siumup takutippaa asuli utoqqaat qineqqusaarutigisimallugit

Tassami Inatsisartunut ilaasortamit, Kristian Jeremiassen, Siumut, siunnersuutit uku:

•    Inoqutigiit isertitaasa annertussusaat aallaavigalugu utoqqalinersiat ilanngaateqartinneqartarnerisa atorunnaarsinneqarnissaa aammalu

•    Utoqqalinersiuteqartut angerlarsimaffimminni ikiorteqartarnerminnut akiliisarunnaarnissaat

Taakku Naalakkersuisunit inatsisartuniillu itigartinneqarput.

Itigartinneqarneranullu taarsiunneqarpoq suliat taakku aaqqissuuseqqinnermi ilanngullugit suliarineqarumaartut Naalakkersuisut unnermassuk.

Siunnersuuteqartoq Kristian Jerimiassen oqaaseqarnermini soorunami pakatsisi-maqaluni oqarpoq: Tassa taakku Siumumi qineqqusaarutigut allassimasut.

Utoqqaat salloqittarneqarput

Kristian Jerimiassen ilumoorpoq. Qineqqusaarutit tununneqarput. Utoqqaat salloqittarneqarput.

Inuit Ataqatigiit qineqqusaarnermi piviusunngortikkasuarsinnaanngisagut oqarlu-artaarutiginngilagut. Nalunngilarput utoqqaat atugaasa pitsanngortinnissaat ataatsimoorullugu suliassaasoq pinngitsooranilu aaqqissuuseqqinnermi tamakkii-sumik ataqatigiissumillu suliassaasoq.

Utoqqaat ikiorneqarnermikkut akiliisarunnaarnissaat tapersernarpoq. Taannali allanngussagutsigu tamakkiisumik allanngortittariaqarparput, aamma atugarliornerusut ikiorluarneroqqullugit.

Inuit Ataqatigiit isumaqarput sullinneqarnermi akiliuteqanngikkaluarluni sullin-neqarsinnaaneq pisariaqartitat naapertorlugit qinnutigineqarsinnaassasoq. Tamannalu  aaqqissuuseqqinnermi suleqataaffigissavarput.

Mimi Karlsen, Inuit Ataqatigiit, mobil: 58 76 19