Sermersuup pilersaarutaa kommuninut allanut maligassiuivoq

Inuit Ataqatigiinnit Kommuneqarfik Sermersuup illoqarfiip pingaarnersaattut pilersaarutaa pissanganarluinnartutut kommuninullu allanut pisussaaffiliisutut isigaarput.

Ukiorpanngortuni nunatsinni inoqarfinnut ataasiakkaanut eqiterukkaluttuinnarneq malinnaaffigaarput annerusumik iliuuseqarfigisinnaanagu. Eqqaamassuarput illoqarfinnut ataasiakkaanut eqiterukkaluttuinnarneq nunatsinniinnaq piunngimmat, nunarsuarmili tamarmi unammillernartutut inissisimavoq, inuiaat isorliunerusumit illoqarfissuarnut nutsertuarmata.

Eqiterukkaluttuinnarneq ajortuinnaanngilaq, illoqarfiit ineriartorfiusut nunamut tamarmut aningaasaqarnikkut siuariartornermik pilersitsisarput. Puigussanngilarputtaaq inuk ineriartortuartuummat periarfissanillu ujaasiuartuummat, taamaattumik illoqarfiit ineriartornermik pilersaaruteqarfiullutillu ineriartorfiusut eqiteruffigineqarnerat ersarittarpoq, tassanilu nunatsinni Nuuk ersarissumik assersuutissaavoq, ilinniarfeqarluarnikkut, sunngiffimmi sammisassaqartitsilluarnikkut ataatsimoorfiusinnaasunillu allanik periarfissaqartitsilluarnikkut, soorunami aamma suliffissat amerlanerusut piuneritigut.

Nunatsinni ukiut aggersut ineriartornissamut periarfissaqarluartut ornippagut, pingaartumik illoqarfinni timmisartoqarfinnik allileriffissatut takorloorneqartuni, assersuutitut Ilulissat Qaqortorlu, soorunami aamma kommunit sinnerini. Sanaartornerup ingerlanerani suliffiit nutaat pilersinneqaannaratik mittarfiit atulernerisa kingorna suliffiit amerlanerusut pilersinneqarfigisinnaasaat, ilaatigut takornariaqarneq ineriartorteqqilluarneqarsinnaalluni. Taamaattumik kommunalbestyrelse-t nutaassat annertuumik pisussaaffeqarput illoqarfiit pilersaarusiornerini siunissaq ungasittoq eqqarsaatigalugu inerisaanissaq pilersaarusiussallugu.

Mittarfiit nutaat takinerusullu pilersinnerisigut nunatsinnit avammut niuernermi periarfissat nutaat ammarneqarsinnaasut nunatta tamarmiusup aningaasaqarneranut sunniuteqarluarsinnaasut pilersaarusiornermi ilanngullugit eqqarsaatigineqartariaqartunut ilaapputtaaq, taamaattumik kommunit ukiuni makkunani suliassakissanngillat – suliassaqassaqaat – tamannalu Inuit Ataqatigiinnit peqataaffigissallutigu assut qilanaarivarput.

 

Bendt B. Kristiansen

Inuit Ataqatigiit

Aningaasaqarnikkut oqaaseqartartoq