Sermersooq – kangianiit kitaanut

 Allattut Iddimanngiiu Bianco aamma Allan Pertti Frandsen, Inuit Ataqatigiit sinnerlugit Kommuneqarfik Sermersuumi kommunalbestyrelsimi ilaasortat.

Qaasuitsup, Qeqqata aamma Kommune Kujalliup borgmesterii 6. august 2014 Atuagagdliutini ataatsimoorlutik ilanngussaqarput qulequtserlugu “
Kalaallit Nunaanni assigiinngitsineq akiussavarput”. Aammattaaq Kujallerup borgmesteria, Jørgen Wæver Johansen, immikkut Sermitsiami 8. august 2014-imi saqqummersumi ilaanngussaqarpoq qulequtserlugu “Assigiinngissutinut takussutissat“.
Kommuneqarfik Sermersuumi Inuit Ataqatigiinniit borgmesterit pingasut nunatsinni tamarmi ineriartortitsinissamik annertuumik kissaateqarnerat isumaqatigaarput – aammalu tamatumani isertitatigut naligiissaarinissaq – taamaattoq tupaallaatigaarput borgmesterit taakkorpiaat immikkoortitserpalaartumik tunngavilersuinerat.

Aallaqqaasiullugu Siumut borgmesteriisa pingasut, kommuninut naligiissaarinermi piviusut aallaavigalugit, tunngavilersukkamillu aalajangersaasoqarnissaanik oqarnerat isumaqatigaarput. Kisianni borgmesterit taakku pingasut suut tunngavilersuutissatut isigineraat atuaratsigit tupaqaagut. Taamami immikkoortitserpalaartigisumik tunngavilersuineq sumi allami takusassaanerpoq:

Siumut-borgmesteriisa Sermersuumik eqqartuineranni, maluginiagassaq erseqqissoq tassaavoq, illoqarfiup Nuup kisimi eqqartorneqarnera. Borgmesterit ilanngutassiaanni takisuumi nunatta Kangia, Paamiut, nunaqarfiillu 8-it Kommuneqarfik Sermersuumi aamma ilaasut, ataasiarlugilluunniit eqqaaneqanngillat. “Takusinaanngikkaanni, eqqaasariaqanngilaq?”, taama apererusuummernarpoq. Tassami ersarilluinnarpoq Siumut-borgmesteriisa pingasut takkuitsooraat Sermersooq illoqarfittaqarmat sisamanik, taakkulu marloriaataannik nunaqarfeqarluni – Sermersuullu iluani sumiiffiit, taakkulu aningaasarsiornikkut inissisimanerni assigiinngitsupilussuusut.

Aamma Siumut-borgmesteriisa pingasut taakku oqaluusererusuttupilussuuaat akileraarutitigut isertitat agguaqatigiinnissaat, eqqartunngilaalli aningaasartuutit agguaqatigiinnissaat. Assersuutigalugu borgmesterit taakku pingasut kissaatigaat, suliffeqarfinni Namminersorlutik Oqartussat pigisaanni sulisut akileraarutaasa nunatta karsianut nakkartinneqartarnissaat, kisiannili Kommuneqarfik Sermersuup karsiata sulisut taakkorpiaat aputaajaanernut, meeraasa atuartinnerannut il.il. akiliuttartussaavaat. Allatut oqaatigalugu: Aningaasat isertut karsimut ataatsimoortumut nakkartinneqassapput, aningaasartuutillu Sermersuumit akilerneqarlutik. Tamanna pissusissamisuunngilaq, ingammik Kommuneqarfik Sermersuumi aningaasartuutit qaffaraluttuinnartillugit, isertitallu ikiliartorlutik.

Sermersuumi borgmesteritta, Asii Chemnitz Narup-ip, Atuagagdliutini normumi pineqartumi allanneratut, Sermersuumi naligiissaarinermut naapertuilluartumut peqataarusuppugut. Kisianni soorlu aamma borgmesteritta allaaserisami “Naligiissaarineq maannak-kut atuuttoq naapertuunneruvoq”–mi saqqummiukkaa, nunatsinni kommunit angisuut sisamat akornanni aningaasaqarnikkut naapertuilluartumik naligiissaarisoqareerpoq. Ukioq manna Sermersooq 106 million kr.-inik kommuninut naligiissaarinermut akiliisareerpoq, annermik Kujallermut, Qaasuitsumullu. Tamannalu ilutigalugu uagut Sermersuup iluani isumaginninnikkut, aningaasaqarnikkullu naligiissaarinermut annertuumik unammilligassaqarluta. Kangianiit kitaanut.

Uani oqallinnermut atatillugu ilanngussami atsiortup aappaa Tasiilami inunngorpoq peroriartorlunilu, aappalu Tasiilami 2000-imiit 2009-mut najugaqarluni, sulillunilu. Kangiani innuttaasut sinnerlugit, mamiasuutigaarput Kommuneqarfik Sermersuup kommunitut pisuutut taakkartorneqarnera. Kikkut tamarmik nalunngilaat Kangianut annertuumik aningaasaliisoqarnissaa pisariaqartinneqartoq, sunulluunniit tunngagaluarpata, inuussutissarsiornermut, isumaginninnermut, imaluunniit ineqarnermut. Naalakkersuisut siunnersuutaattut, kommunimut aningaasaliissutinik equngasumik agguaassisoqassappat, tamanna Kalaallit Nunaata Kangiani innuttaasut siulliullutik malugisussaavaat. Aammalumi Kommuneqarfik Sermersuumi innuttaasut allat malugisussaassallugu.

Naalakkersuisut siunnersuutaat malillugu, Sermersooq tassaalissaaq innuttaminut ataatsimut aningaasanik ikinnerpaanik atuisinnaalersussaq. Tamanna ilumoorsinnaanngilaq. Uagut Sermersuumiit kissaatiginngilarput taama pisoqarnissaa. Taamaammat Naalakkersuisut kommuninut naligiissaarinermut siunnersuutaat kingulleq sakkortuumik akerleraarput. Aamma taamaammat oqallinnermi aammalu kingullermik innuttaasunik 6. august Ittoqqortoormiini, Tasiilami, Paamiuni, Nuummilu ataatsimiisitsinitsinni, kisitsisit ersarissut saqqummiuppagut, IMMIKKUT 56 million kr.-it kommuninut naligiisaarinermi peerneqarpata, tamanna Sermersuumi innuttaasunut qanoq ajortigisumik kingu-neqarsinnaanersoq takutillugu.

Sermersuumi atorusupparput ammasuuneq, innuttaasunillu peqataatitsineq. Matumanilu pissutsit piviusut oqaluttuaraagut. IMMIKKUT 56 million kr.-it Sermersuup aningaasaqarneranut aarlerinartuupput. Sermersooq aningaasatigut ajalusuussappat, nunarput tamarmi eqqorneqartussaavoq. Sermersuumiit kissaatigaarput, naligiisitsiniarnerup piffissaq ungasissoq isigalugu iluarsiiviginiarnissaa. Aaqqiissutissamik nassaartoqartariaqarpoq. Naalakkersuisut, kommunillu ataqqeqatigiillutik oqaloqatigiinnerisigut.

Inuulluaqqusilluta

Iddimanngiiu Bianco, Inuit Ataqatigiit, kommunalbestyrelsemut ilaasortaq, Kommuneqarfik Sermersooq, mobil +299 54 88 44, itbi@sermersooq.gl

Allan Pertti Frandsen, Inuit Ataqatigiit, kommunalbestyrelsemut ilaasortaq, Kommuneqarfik Sermersooq, mobil +299 59 87 55, apfr@sermersooq.gl, www.facebook.com/ia.pertti