Meeqqat ulluanni meeqqat nuannisassapput

1.juni 2014

 

Meeqqat ulluanni meeqqat nuannisassapput

Asasavut meeqqat

Junip aallaqqaataani sineriak tamakkerlugu ilissi ullorsi nalliuttorsiutigineqarpoq. Ulloq manna nuannaarnermik nukissanillu siammarteriutigaluta meeqqatut pisinnaatitaaffissilu qitiutippavut.

Meeqqamut inuuneq nuannersoq toqqissisimanartumik peroriartornissamut tunngavoq.  Angerlarsimaffimmi toqqissisimanissarsi, paaqqinnittarfinni, atuarfinni fritidsklubbinilu toqqissisimanissarsi.

Meeqqanut amerlanerpaanut inuunissinni ukiuni siullernik arlalinni angajoqqaasi qitiupput. Angajoqqaassi toqqissisimanartumik ulluinnarni inuunissinniisumagisarpaat. Angajoqqaassi toqqagaat sorpassuit, soorlu qanoq nerisaqassanersusi qanorlu angerlarsimaffeqassanersusi, inuunissinni qanoq periarfissaqarnissassinnik misigisaqarnissassinnillu aalajangiisarput.

Meeqqatut pisinnaatitaaffeqarpusi. Ilarpassuasi pisinnaatitaaffiit taakku pillugit atuarfimmi ilinniagaqartarpusi. Pisinnaatitaaffiit isumaqarput meeqqat tamaavimmik ajunngittumik pineqassasut, angerlasimaffeqassasut, atuassasut, naammattumik peqqinnartunillu nerisaqassasut, pinnguarnissamut misigisaqarnissamullu piffissaqassasut.

Meeqqat ilaat persuttaanertalimmik imerpallaarnertalimmillu angerlarsimaffeqaput. Meeqqat ilaat namminneq persuttarneqartarput. Taamaammat Meeqqat ulloqarnissaa pingaaruteqarpoq. Ullumikkut inersimasut ilissinnik isumaginnilluarnissamik pisinnaatitaaffissinnillu illersuinissamik eqqaasinneqarput.

Meeqqat aamma ulluinnaap qanoq innissaanik aalajangeeqataanissamut pisinnaatitaaffeqarput, soorlu meeqqat qinngasaarneqannginnissamut pimmatigineqannginnissamullu aamma pisinnaatitaaffeqartut.

Meeqqatut pisinnaatitaaffisi suunerinik paasisaqarnissarsi pisinnaatitaaffigaarsi inersimasullu tamatta pisinnaatitaaffissinnik ataqqinninnissamutpisussaaffigaagut.

Nalussanngilarsi inersimasut tamakkerluta ilissi pillusi maaniikkatta. Tamassi paarilluarusuppatsigit, ajornartorsiuteqaraangassilu apeqqutissaqaraangassiluunniit saaffiginnissinnaajuaannarpusi.

Neriuppugut nuannersumik, pinnguarluarlusi misigisaqarluarlusilu ulloq atussagissi. Nuannisarluarisi, immissinnut ilassinneqattaaritsi. Meeqqat, atorfissaqartippatsigit, eqqarsaatisi oqaatigisartakkasilu atorfissaqartittuarpavut. Amerlasuutigut inersimasut oqaasissaaleqisut ilissi oqaatsit eqqorluinnartut annittarpasi. Inersimasut puigorsimasinnaasaannik inuunermik ilissi isiginnittariaaseqarpusi. Tamatta inuunerput naleqarnerulersipparsi. Qujanaq.

Ulloq atorluarisiuk.

Inuit Ataqatigiit siulittaasuat Sara Olsvig, mobil: 526858