Innuttaasunik taasititsineq Nunatta tatiginassusaanik nukittorsaassaaq

Innuttaasut taasitinneqarnissaat pillugu aalajangiinissamut akisussaaffik maanna tamakkiisumik naalakkersuisooqatigiit partiivisa tigummivaat. Inuit Ataqatigiit innuttaasut taasitinneqarnissaannik siunnersuuterput, Inatsisartut ataatsimiinneranni immikkoortoq 97, illuatungiliuttunit ataatsimoorfigineqarpoq.

Naalakkersuisut Inuit Ataqatigiit siunnersuutitsinnut akissuteqaamminni allapput, innuttaasunik taasititsisoqassappat Kalaallit Nunaata tatiginassuseqarnera ajoquserneqassasoq. Inuit Ataqatigiinnit tamanna isumaqatiginngilarput. Akerlianik isumaqarpugut, taasititsineq Nunatta tatiginassusaanik nukittorsaassasoq.

Pissutsit piviusut ullumikkut atuuttut takutippaat innuttaasut uranimik ulorianartunillu qinngornertalinnik allanik piiaanissamut avissaartuuteqqammata. Patajaatsumik inissiinissamut aqqutissatuarput tassaavoq taasititsinissaq. Aatsaat taama ilinikkut innuttaasut qanoq pisinnaatitsiniarnersut paasisinnaavarput.

2013-mili, uranimik attueqqusinngilluinnarneq innuttaasut peqataatinnagit piissallugu aalajangiunneqarmat Nunatta urani pillugu politikkia patajaanngitsumik inissippoq. Aningaasaliisartut ingerlatseqatigiiffiillu ilisimajuarsimavaat inuiaqatitsinni politikkikkullu urani pillugu avissaartuuttoqarmat.

Naalakkersuisut qanoq neriorsuigamik?

Naalakkersuisut akissuteqaatiminni aamma allapput uranimut naaggaartoqarpat eqqartuussivikkut kinguneqartitsisoqarsinnaanera inuiaqatigiinnut kalaallinut sakkortuumik eqquisinnaasoq.

Inuit Ataqatigiinnit naatsorsuutigilluinnarparput Naalakkersuisut ingerlatseqatigiiffiit arlaannaalluunniit pinngitsuunngiivillutik ulorianartunik qinngornertalinnik piiaanissaminnut akuerineqarumaarnissaannik neriorsuisimassanngitsut. Naalakkersuisummi taamatut neriorsuuteqarsimappata aatsitassanut inatsimmik kusanaalluinnartumik avaqqutaarinnissimassapput. Aatsitassanummi inatsimmi VVM, avatangiisinut sunniutissanik naliliineq, tusarniaassutigineqartussaavoq, tusarniaanermilu soorunami naaggaarnermik inerniliisoqarsinnaavoq.

Apeqqut suli tusarniaassutigineqanngitsoq aalajangiiffigineqareersimappat VVM-p tusarniaassutigineqarnera asuli takutitsinerinnaassaaq. Tamatuma saniatigut Naalakkersuisut 2013-mi nalunaarput Kuannersuarni ingerlatseqatigiiffiup misissuissalluni aalajangersimasup piiaanissamik akuersissummik tunniussiumanngissinnaaneq politikkikkut tunngavilersorneqarsinnaanera pillugu paasinnilluni nalunaarutigisimagaa.

Inuit Ataqatigiinnit Naalakkersuisut erseqqissumik akeqqussavagut ingerlatseqatigiiffiit arlaannaalluunniit Naalakkersuisunit inuiaqatigiit Inatsisartullu ilisimanngisaannik arlaannik neriorsorneqarsimanersut?

Nunarput suli uranimik ulorianartunillu qinngornertalinnik piiaanissamut naaggaarsinnaatitaavoq. Tamanna nalornissutigineqassanngilaq.

Inuit Ataqatigiit kaammattuutigeqqissavarput taasititsinissamik siunnersuuterput amerlanerussuteqartunit ilalerneqassasoq. Akisussaaffik naalakkersuisooqatigiit partiiviniippoq.

Sara Olsvig

Siulittaasoq, Inuit Ataqatigiit