Uran pillugu Partii Naleraq ersarissumik nassuiaateqarli

Inatsisartunut qinersinerup kingorna suleqatigiilersut katitigaanerisalu kingunerisaanik nalorninarsivoq partii Naleraq Kuannersuarni uranitalinnik piiaanissamut apeqqummi qanoq isummersimanersoq. Tamanna ersarissumik paaserusupparput.

Naalakkersuisooqatigiit isumaqatigiissutiminni immikkoortoq 166, uranisiornissamik oqariartuutitalik ersarimmat, paaserusunnarsivoq Partii Naleraq aamma uranisiorusulluni tassani akuersaaqataanersoq.

Kuannersuarni aatsitassarsiorfik ammaanneqassagaluarpat uumasuuteqarnermik ingerlatsineq ukiuni 100-nit amerlanerusuni siulitsinnit ineriartortitaq, ukiualuinnaat ingerlanerini annaariaannaavarput.

Nunatsinni nammineq pilersornerunermik oqalunnitsinnut taanna naapertuutinngilaq.

Takornariaqarnermik inerisaaniarneq annertuumik innarlerneqassaaq, UNISCO-p periarfissarujussuamik ammaassinissaralua ipitinneqariaannaavoq, kinami aatitassarsiorfiup uranitalinnik piiaaffiusup eqqannguanut takornariassagami!

Takornariaqarneq nunap immikkortuani annertuumik inerisarneqarsinnaavoq, inuussutissarsiortunut amerlasuunut annertuumik iluaqutaasussamik.

Nunatta kujataani suliffissaqartitsinikkut tamanna annertuumik periarfissiissaaq. Aalisakkanik tunisassiorneq ukiuni kingullerni nunatta kujataani annertusiartoqqilersoq inerisaqqinneqartariaqarpoq, suliffissanik suli amerlanerusunik pilersitsinissaq siunertaralugu. Tamanna pisinnaavoq Naalakkersuisut kommuunillu qanimut suleqatigiinnerisigut.

Uumasuutinik amerlisaanissaq, neqiliortunillu allanik, soorlu kukkukuunik puulukinillu uumasuuteqarnermik inerisaanissaq nunatsinnut iluaqutaaffissaqarnerungaarpoq. Mingutsitsineq ukiorpassuarni kinguaariinnut nammatassiissussaq akuersaanngilluinnarparput. Nunarput minguitsoq, kinguaassatsinnit attartugarput, ”aningaasaannaat” pillugit  pilliutiginianngilarput!

Inuit Ataqatigiit, kommunalbestyrelsemi ilaasortat sinnerlugit (Kommune Kujalleq)

Stine Egede

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 346 272
Fax: (+299) 321 321
Website: http://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl