Nunarput nukittunerulissappat aqutsilluarneruneq allaffissornikkullu ingerlalluarnerulerneq pisariaqarpoq

Akimuisumik suleqatigiinnerup aaqqissuussinerullu, nunatta siulersorneqarnerata aqunneqarneratalu Kalaallit Nunatta nukittunerulernissaanut akimmiffiussannginnera qulakkiissavaa. Qinersinerup kingorna allaffissornermik ingerlatsinermi nammineq susassaqarfigisaannavinnut eqqarsartaaseq qaangerniarlugu iliuuseqartoqassaaq.

Qinersinerup kingorna Inuit Ataqatigiit siuttunngussappata, Inuit Ataqatigiit siulittaasuata Sara Olsvigip qitiusumik allaffissuup nutaamik aaqqissuuteqqinneqarnissaa siunniuppa, ilaatigullu makku siunnersuutigalugit:

  • Akisussaaffinnik nutaamik siunertaqarnerusumillu agguaasseriaaseqarneq
  • Nammineq susassaqarfigisaannavinnut eqqarsartaaseqarneq atorunnaarsinneqassaaq – Naalakkersuisoqarfiit akimorlugit eqqarsaqatigiinnerusarnissaq ataqatigiissaarinerunerlu atorneqalissaaq
  • Allaffissorpallaarneq qimanneqartariaqarpoq –annikinnerit sulianik naammassinnillaqqinnerukkajupput
  • Innuttaasut namminersorlutillu inuussutissarsiortut qitiutinneqassapput – allaffissorneq inuiaqatigiinnik suliniarfiuvoq – imminut suliniuteqartuunngilaq

Isumaginninnermut tunngasuni akimuinerusumik sulianik ingerlatsisariaqarnerput Naalakkersuisutut nassuerutigisimasanni pingaarnersaavoq. Isumaginninnermut politikki aamma ilinniartitaanermut, ineqarnermut suliffeqarnermullu politikkimut attuumassuteqarpoq. Inuiaqatigiinni unammillernartittakkavut aaqqiivigissagutsigit akisussaaffeqarfiit akimornerullugit suleqatigiinnerusariaqarpugut. Meeqqanut kinguaassiutitigut atornerlunneqarsimasunut, sumiginnagaasimasunut angajoqqaaminnillu iliuuseqarfigineqarnermik amigaateqartunut suliniarnitta pitsanngorsarnissaa pingaarnerutissavarput. Meeraq ilivitsoq, inuk ilivitsoq aallaavigissavarput, taamaaliornitsigullu innuttaasoq aggulullugu ilivitsuutinngisaannarlugu sullitassatut isigisarnatigu. Akisussaaffeqarfiit akimorlugit sulinikkut taamaallaat taamaaliorsinnaavugut, Naalakkersuisunullu siulittaasunngussaguma tamanna siuttuuffigissavara.

Ukiorpassuanngortuni aningaasaliisartut aatsitassanillu ujarlertartut aatsitassarsiorfiillu nunanit aallaneersut tutsuigineqannginnermik allaffissornerujussuarmik kiisalu naassaanngiusattumik suliat ingerlanneqartuarnerannik oqariartortuarnerat tusartareerparput. Taamaaliornitsigullu nutaatut immitsinnut akornutissalersorpugut. Naak ukiuni kingullerni pissutsit pitsanngoriaraluartut, taamaattoq inuussutissarsiornermut aatsitassarsiornermullu immikkoortumi atorfilittat ilaasa pissusilersoriaasaat allanngortittariaqarput. Maannalumi Inuit Ataqatigiinnit taakku tikillugit tillisioreersimalerpavut – suullu iliuuseqarfigisariaqarnerat paasillutigu, taamaammallu ajornartorsiutit iliuuseqarfiginissaannut piareeqqavugut” Inuit Ataqatigiit siulittaasuat nangippoq.

Assersuutigalugu nunalerinermut oqartussaaffik nunanut allanut politikkimut namminiilivinnissamullu tunngasunut ilanngutitikkaanni, taava nunalerinermut tunngasut piffissaqarfiginngitsoorneqarsinnaanerat ersarippoq. Oqartussaaffeqarfinnut tunngasunik pilersaarusiornitsinni silatusaarnerusariaqarpugut, minnerunngitsumillu pissutsinik akimuisunik pilersaarusiornermik qulakkeerinninnerulluta.

Ilisimatusarnermi suliniutit annikitsuaqqanut tunngasunik suliniutini, arlaannaatigulluunniit pitsaanngitsumik sunniuteqartussaanngitsunik avammut annissinissamut akuersissutit aatsaat qaammaterpassuarni suliarineqareerlutik naammassineqartarnerannik, taakkulu akerlilersorneqarlutik pisariaqanngitsumillu allaffissornerujussuarmik nalaataqarnernik assersuutit aamma tusarsimavakka. Pissutsit taamaattut nunatsinnut iluaqutaasussanik ilisimasaqalernissatsinnut kinguarsaappata, tamakku Kalaallit Nunatsinnik sanngiillisitsissapput.

Namminersorlutik inuussutissarsiortut, ilisimatusartut minnerunngitsumillu innuttaasut akornanni assersuutissarpassuarnik peqartoqartoq qularutiginngilara. Tamakku saqqummiutissavavut taamaaliornitsigut pisariaqartitsivinni iliuuseqarsinnaaqqulluta. Taamaammat innuttaasut, kattuffiit, suliffeqarfiit namminersorlutillu inuussutissarsiortut qanoq iliornitsigut allaffissornermik eqaannerusumik atuisunullu samminerusumik ingerlatsilernissatsinnik paasiniaanitsinni peqataanissaannut kaammattorumavakka.

Sara Olsvig, siulittaasoq, Inuit Ataqatigiit.

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 346 272
Fax: (+299) 321 321
Website: http://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl