GME Kuannersuarni piianissaminut itigartitaaguni taarsiiffigitissinnaanngilaq

§37 atorlugu Aqqaluaq B. Egede Naalakkersuisunut apeqquteqarpoq GME piianissamut itigartitaaguni taarsiiffigitinnissaminut piumasaqarsinnaanersoq. Naalakkersuisut oqarput NAAMIK!

 

 

 

Inatsisartunut ilaasortaq

Aqqaluaq B. Egede, Inuit Ataqatigiit

 

 

Taarsiinissamut tunngasoq § 37 tunngavigalugu apeqqut nr. 2016-115-mut akissut

 

Inatsisartut suleriaasianni § 37 naapertorlugu Naalakkersuisunut imaattunik apeqquteqarpunga.

1.

Naalakkersuisuit 23. oktober 2013 “Immikkoortoq 709-711-mut tunngatillugu atugassarititaasussanut nalinginnaasunut september 2010-imeersunut tapiliussaq aamma sumiiffimmut Kalaallit Nunaata kujataani Kuannersuarni akuersissummut 2010/02-mut tapiliussaq nr. 1 pillugit nassuiaat”-mi taamani Aatsitassanut Naalakkersuisuusumit atsiorneqarsimasumi ima allapput:

“302. Pisinnaatitsissummik pigisaqartoq pinngoqqaatinik qinngornermik ulorianartunik akulinnik piiaanissamut akuersissummik tunineqarnissamik qinnuteqarpat, takuuk immikkoortoq 301, Naalakkersuisut qinnuteqaat nammineerlutik aammalu arlaannik tunngaveqanngitsumik imaluunniit sumilluunniit tunngaveqanngitsumik itigartissinnaavaat. Qinnuteqaat ilaatigut politikkikkut imaluunniit ingerlatsivimmi pinngoqqaatinik qinngornermik ulorianartunik akulinnik piiaanissamut akuersissummik tunniussisannginnissamik aalajangiineq tunngavigalugu itigartinneqarsinnaavoq. Qinnuteqaammik itigartitsineq pisussaaffeqarnermik akisussaaffeqarnermillu malitseqassanngilaq, ilanngullugit Namminersorlutik Oqartussanut, Naalakkersuisunut imaluunniit Aatsitassanut Ikummatissanullu Pisortaqarfimmut taarsiinissamik akisussaaffiliissanani”.

Aamma:

 

“303. Pisinnaatitsissummik pigisaqartoq pinngoqqaatinik qinngornernik ulorianartunik akulinnik piiaanissamut akuerissummik tunineqarnissamik qinnuteqarpat, tak. Immikkoortoq 301, Naalakkersuisut pinngoqqaatinik qinngornernik ulorianartunik akulinnik piiaanissamut atugassarititaasut suulluunniit nammineerlutik aammalu killilersuutitaqanngitsumik aalajangersarsinnaavaat. Naalakkersuisut ilaatigut piiaanermi ingerlatanut, isumannaallisaanermut peqqinnissamut, avatangiisinut, pisuussutinik atorluaanermut aamma inuiaqatigiinni piujuartussamik iluaqutaasumik sunniutaasussanut atugassarititaasussanik kiisalu pisinnaatitsissummik pigisaqartoq Kalaallit Nunaanni Namminersorlutik Oqartussanut akuliuteqassanersoq aalajangersaasinnaapput. Naalakkersuisut tassunga ilanngullugu nammineerlutik aamma arlaatigulluunniit killilersuutitaqanngitsumik ukiumoortumik akitsuummik sumiiffiup akuersissummi pineqartumut ilaasup angissusaa tunngavigalugu naatsorsugaasumik akiliuteqarnissamik (nunaminertamut akitsuut) atugassarititaasussanik, akitsuummik aatsitassat piiarneqartut ilaalu ilanngullugit tunngavigalugit naatsorsorneqartumik akiliuteqarnissamik (tunisassiornermut akitsuut) atugassarititaasussanik imaluunniit suliaqarnermit akuersissummi pineqartunut ilaasumit aningaasatigut pissarsiat ilaannik Kalaallit Nunaanni Namminersorlutik Oqartussanut qupp. 2 akiliuteqarnissamik (pissarsianit akitsuut) atugassarititaasussanik aalajangersaasinnaapput”.

2.

Nassuiaammi nassuiarneqartut suli atuuppat?

Akissut:

Qulaani allassimasut issuaanerit Kujataani Kuannersuit eqqaanni nunami kisermaassiluni misissueqqissaarnissamut Greenland Minerals & Energy A/S-ip akuersissutaanut nr. 2010/02-mut tapiliussami akuersinermut piumasaqaatinit toqqaannartumik issuaanerupput.

Tapiliussaq ulloq 3. april 2012-mi atulersinneqarpoq sulilu atuulluni. Tapiliussaq misissuinissamut isumaqatigiissut nr. 2012/02-mut ilaavoq.

Immikkoortoq 709-711 aamma Kujataani Kuannersuit eqqaanni nunaminertaq pillugu akuersissummut 2010/02-mut tapiliussamut tunngasumut september 2010-meersumut nalinginnaasumik piumasaqaatinut tapiliussaq pillugu nassuiaammi allanneqarsimasut suli atuupput.

3.

Naalakkersuisut allanik ingerlatseqatigiiffiup taarsiiffigitinneqarnissaminut piumasaqaateqarsinnaaneranut naliliisoqarneranut oqaasissaqarpat?

Akissut:

Ingerlatseqatigiiffimmut pisinnaatitaaffeqartumut Greenland Minerals & Energi A/S-imut misissuinissamut akuersissummut nr. 2010/02-mut tapiliussaq malillugu ingerlatseqatigiiffik pisinnaatitaaffeqartoq pinngoqqaatinik qinngornernik ulorianartunik akulinnik misissuinissamut pisinnaatitaaffeqarpoq.

 

Taamaattorli akuersissummut tapiliussaq malillugu ingerlatseqatigiiffik pisinnaatitaaffeqartoq pinngoqqaatinik qinngornernik ulorianartunik akulinnik iluaquteqarnissamut akuersissummik nalunaarfigineqarnissamut pisinnaatitaaffeqanngilaq, naak ingerlatseqatigiiffiup pisinnaatitaaffeqartup uppernarsaraluaraa killeqartumik niuerutigineqarsinnaasunillu pinngoqqaatinik qinngornernik ulorianarutnik akulinnik peqartoq allatigullu misissuinissamut akuersissummi piumasaqaatinik naammassinnissimagaluarluni.

Akuersissummut tapiliussamit takuneqarsinnaavoq pinngoqqaatinik qinngornernik ulorianartunik akulinnik iluaquteqarnissamut akuersissummik nalunaarfigineqarnissaq pillugu qinnuteqaammik Naalakkersuisut itigartitsisinnaasut. Sunaluunniit tunngavigalugu qinnuteqaat itigartinneqarsinnaavoq, tassunga ilanngullugu politikkikkut imaluunniit ingerlatsivikkut peqquteqartumik, allarluinnarmilluunniit peqquteqartumik.

Akuersissummut tapiliussap aamma toqqaannartumik malitsigaa pinngoqqaatinik qinngornernik ulorianartunik akulinnik iluaquteqarnissamut akuersissummik nalunaarfigineqarnissaq pillugu qinnuteqaammik itigartitsineq kalaallit nunaanni oqartussanut pisussaaffinnik imaluunniit akisussaaffinnik kinguneqassanngitsoq, tassunga ilanngullugu taarsiinissamut akisussaaneq.

Tamanna tunuliaqutaralugu Naalakkersuisut naliliinerat suli tassaavoq assersuutigalugu pinngoqqaatit qinngornernik ulorianartunik akullit pillugit innuttaasut taasitinneqarneri tunuliaqutaralugu pinngoqqaatinik qinngornernik ulorianartunik akulinnik iluaquteqarnissamut akuersissummik nalunaarfigineqarnissaq pillugu qinnuteqaammik Naalakkersuisut itigartitsissagaluarpata Greenland Minerals & Energy A/S kalaallit nunaanni oqartussanut taarsiiffigineqarnissamut piumasaqaateqarnissamut pisinnaatitaaffeqanngitsoq.

 

Inussiarnersumik inuulluaqqusillunga

Randi Vestergaard Evaldsen

 

Naalakkersuisut akissutaat uani aasinnaavat:

115_erstatningskrav_aqqe_akissut