Tusagassiutinut Nalunaarut: Suliniutinut annertuunut

Inatsisartuni Inuit Ataqatigiit gruppianniit

 

Kiisami Suliniutinut annertuunut tunngatillugu inatsimmut siunnersuut Naalakkersuisuniit saqqummiunneqarpoq. Inatsit tamanna Siumup taasineqarmat akuerinngisaa demokratiskiusumillu ingerlatsinermik avaqqussinertut isigalugu tuaviorpallaamik suliarineqarsorisaa.

 

Suliniutinut annertuunut tunngatillugu inatsimmi sutigut allannguisoqarnissaanik Siumumiit akissutisinissaq ajornakusoorsimaqaaq. Maanna takutinneqarpoq eqqortoq tassaasimassasoq Siumup suliniutinut annertuunut tunngatillugu inatsimmik paasinnissimannginnera. Tassami naalakkersuisooqatigiit allannguutissatut siunnersuutaat oqaatsinik atukkanik allanngortiteriinnarneruvoq, imarisaami allannguuteqanngilluinnarpoq. Tassa imaappoq Siumup isornartorsiuerujussuarnera tassaaginnarsimasoq allatut oqaatiginninnissamik kissaateqarsimaneq. Inatsisillu pingajussaaneerneqarnerani Siumup tikkuagatuaa tassaammat naqinnerliugaq tamanna naliliinermut tassunga naapertuuppoq. Allannguutissat minnerusut Siumup maanna siunnersuutigisai decembarimi inatsit suliarineqarmat ilanngunneqarsimasinnaasimagaluarput. Tamanna ammaffigineqassagaluarpoq – tassami imaanik allannguiffiunngillat.

 

 

Tamakkiisumik ilungersuussinnginneq naalakkersuinikkut suliaqartut innuttaasunit tatigineqaatimikkut eqqorneqaatiginngikkaluarpassuk pisoq tamanna quianaannassagaluarpoq. Sunami upperineqassava partii oqarpat inatsit akuerineqarsinnaanngilluinnartoq, taamaattorli inatsimmik saqqummiusseqqinnermi oqaatsit allanngortilaaginnarlugit imarisaanullu allannguutaanngitsumik saqqummiussippata? Ajorsartullu tassaavugut tamatta. Suliniutinut annertuunut inatsimmut Siumup isornartorsiuinera inuussutissarsiutinik ingerlataqarfiit eqqarsaatigalugit atugassatigut nalornilersitsisimavoq, nunatsinni nunanilu allani tusagassiutitigut sammineqarluarsimavoq maannalu atorfillit imaanik allannguinngikkaluarlutik oqaatsinik allanngortiterinissaannut allaffissornikkut annertuunik aningaasartuuteqartoqarsimavoq. Taamaasillutami suliassaqarluarsimavugut….

 

 

Taamatuttaaq naalakkersuisooqatigiit isumaqatigiissutaanni nassuiarneqarsimasutigut suliniutinut annertuunut inatsisip allannguuteqarnissaanik siunnersuuteqannginneq tupinnarpoq. Tassani pineqartut tassaapput oqaatsinut tunngatillugu piumasarisat, imaatigut assartuussinermut malittarisassanut tunngasut kalaallillu sulisartunut kattuffiisa isumaqatigiinniarnissamut pisinnaatitaaffiinut tunngasut.

Tassani patsisaasoq soorunami tassaavoq suliniutinut annertuunut inatsimmik suliaqarnermi inatsisit isumaqatigiissutillu atuutereersut eqqarsaatigineqarsimammata. Tullissaani inatsisissanut siunnersuutit Inatsisartunut saqqummiunneqartut aallaqqaammulli sukumiisumik misissorneqaraluarpata piffissarujussuaq, aningaasarparujussuit oqaaserparujussuillu sipaarneqassagaluarput.

 

 

Naalakkersuisut suliniutinut annertuunut inatsimmut siunnersuutertik aatsaat massakkut nassiuppaat tusarniaanermi 13. september killiliunneqarsimalluni. Tassanilu inunnuttaasut oqallinnissamut piffissaqanngingajavinnerat  maluginiaannartariaqarpoq. Inuit Ataqatigiinniit soorunami inatsisip isumaqatiginiutigineqaqqinnerani peqataalluassaagut, siullermisullu pimoorussilluta suliniutinut annertuunut inatsimmut tunngatillugu tusarniaanermi akissutissat qilanaarivagut. Oqallilluarisi.

 

Annertunerumik paasisaqarusukkuit attavigiuk:

Inuit Ataqatigiit siulittaasuat Kuupik Kleist, oqarasuaat 32 37 02

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl