Tunngaviusumik inatsisiliornissamut isumalioqatigiissitaq allanngoraqattaanngitsoq, sullarissoq peqataatitsisorlu atorfissaqartinneqarpoq

Inuit Ataqatigiit Inatsisartuni gruppeata Debora Kleist Tunngaviusumik inatsisissaq pillugu Isumalioqatigiissitamut ilaasortassatut toqqarpaat. Debora Kleist politikkikkut misilittagaqarluarnermigut ataatsimoortitsillaqqissuunermigullu Tunngaviusumik inatsisissaq pillugu Isumalioqatigiissitami ilaasortaatitatta aappaa Mimi Karlsen peqatigalugu nukittorsaqqinnissaanut piginnaasaqarluarpoq.

Tunngaviusumik inatsisissamut isumalioqatigiissitami suliap nanginnissaanut qilanaarpugut. Inuit Ataqatigiit ukiortaami oqaaseqaammi ima oqarpugut:

“Inuiaat kiffaanngissuseqartut tassaassapput inuit aamma ilukkut nukittullutik kiffaanngissuseqartut, pigiliutiinnakkanik isumaqarfigineqanngitsut, immikkoortitaanngitsut, naqisimaneqanngitsut. Suliassat siunitsinniittut tamatsinnit kivitseqataaffigineqartariaqarput akisussaaqataaffigineqartariaqarlutillu”.

“Tamanik inissaqartitsineq Inuit Ataqatigiit tunngaviusumik inatsisissatsinni malitassatut tunngaviusutut pingaartitaraarput. Tunngaviusumimmi inatsit inuit innuttaasutut politikkikkullu pisinnaatitaaffiinik imaqartussaavoq. Kia sumik pisinnaatitaaffeqarneranik apeqqusiisoqassappat aalajangiusimaffigaarput kinaluunniit imminut kalaalertut isigisoq akuersaarneqassammat. Aamma uatsinnut tunngaviulluinnarpoq nunatut nunatsinni ikinnerussuteqartunut pisussaaffitsinnik naammassinnittassagatta. Allatut oqaatigalugu peqataatitsissaagut, immikkoortitsinata. Tamanna kinaassutsimut, oqaatsinut, qanoq isikkoqarnermut inuiaassusermullu atuutissaaq. Tamattami atorfissaqartinneqarpugut”.

Inuit Ataqatigiit isumalioqatigiissitami tunngaviusumik anguniakkat taakkua ilungersuunnissai nangissavarput. Sulinerup nuna inuiaallu katersuutsissavai, avissaartuutsinnagit.

Aalaakkaasumik ilaasorleeriaaseqarneq pisariaqarpoq

Inuit Ataqatigiit Isumalioqatigiissitap sulinerata aallartisarnerani suliaq politikkikkut pinnaassutaasimanera uggornartutut isigaarput. Isumalioqatigiissitami suliap imarisaa ullormit siullermit samminagu piffissarujussuaq nukipparujussuillu kikkut ilaasortaanissaannut isummersoqattaarnermut atorneqarput. Tuinngaviusumik inatsisissaq pillugu Isumalioqatigiissitap siulersorneqarnerani aqutsilluarnerusoqarnissaanik piumasaqarpugut, suliallu torersumik ataatsimoorfiusumillu ingerlanneqarnissaanik sakkortuumik kaammattuivugut.

Naalakkersuisut ulloq 10. januar 2018 Tunngaviusumik Inatsisissaq pillugu Isumalioqatigiissitap inuttaligaaneranut apeqqutinut marlunnut isummerput.

Inuit Ataqatigiit Isumalioqatigiissitamut ilaasortaatitatta aappaata ilaasortaaginnarnissaanut qinnuteqaatitta itigartinneqarnerani Naalakkersuisuni ikinnerussuteqarluta amerlanerussuteqartunit allaanerusumik isummerpugut. Amerlanerussuteqartut isummernerat tusaatissatut tiguarput.

Neriuutigaarput ilaasortaatitatsinnik maanna taasiisariaqarnermik aalajangerneq siunissami Isumalioqatigiissitamut ilaasortanik taarsiisaqattaartalernissamik kinguneqassanngitsoq.

Pisut aalajangiiffigineqartariaqalersimasullu kingulliit eqqarsaatigilluagaanerusumik inuttaleeriaaseqartariaqarnermik pisariaqartitsisoqarnera takutippaat.

Siammasissumik peqataatitsineq

Inuit Ataqatigiit erseqqissaqqissavarput Tunngaviusumik inatsisiliornissamut suliaq siammasissumik peqataaffigineqartumik ingerlanneqartariaqarmat isumaqaratta. Tamanna isumaqarpoq inuiaqatigiinni kattuffiit, kommunit, sussaqartut minnerunngitsumillu innuttaasullu peqataatinneqarnerungaarlutik suleriaaseqartoqassasoq isumaqartugut. Taamaammat uagut qaqissimasatsinnik kommuninit maanna peqataasartoqalernissaannik qulakkeerinnittoqarmat. Innuttaasunik peqataatitsinissamut erseqqissumik pilersaarusiornissat Isumalioqatigiissitamit nangittumik piumasaqassaagut, pilersaarusiarlu tamanna paasisaqarfiginerulissallugu qilanaaraarput.

Qinigaaffiulli tulliani Isumalioqatigiissitamik inuttaleeriaaseq nalilersuiffigineqaqqittariaqarmat isumaqaratta oqaatigereerumavarput.

Innuttaasunut qaninnerusumik peqataatitsinerusumillu suleriaasilimmik, allanngoraqattaanngitsumik, suliassamut ilisimasaqarluarnerusumik suliassamullu piffissalinnik inuttaligaasumik isumalioqatigiissitamik ilusilersuisoqarnissaa Inuit Ataqatigiit siuttuuffigissavarput.

Sara Olsvig

Siulittaasoq

Inuit Ataqatigiit