Suliniutit Ilanngaassivittut ittut kisimiitinneqarsinnaanngillat

Innuttaasut pisortanut akiitsullit pitsaanerpaamik ikiorserniarlugit akiitsoqarneq pillugu siunnersuisarfimmik pilersitsisariaqarpugut. Tamanna suliniutini ilanngaassivittut ittuni saniatigut ingerlanneqarsinnaavoq, suliniutillu ilanngaassivittut ittut kisimiitinneqassanngillat.

Ilanngaassivik inuiaqatigiinni nangittumik oqallisigineqarpoq. Siunnersuut maanna 2011-mili naalakkersuisooqatigiissimasunit nikerartunit saqqummiunneqartarpoq siunnertaavorlu 1 milliard tungaanut innuttaasuusugut pisortanut akiitsoqarnernitsinnik apparsaanissaq.

Tamatta isumaqatigiisutigisinnaagunarparput innuttaasut taama akiitsoqartiginerput pitsaasuunngimmat. Iliuuseqartoqartariaqarpoq. Piffissarli ungasinneq qiviarlugu sulissagutta innuttaasullu akiitsoqalertarnerat akiuvissagutsigu Ilanngaassivik naammassorinngilarput.

Siunnersuisarfik pisariaqarpoq

Inuit Ataqatigiit akiitsulinnut siunnersuisarfimmik Islandimi akiitsullit ombudsmandiatut ittumik pilersitsisoqarnissaa periarfissatut tikkuarsimavarput. Inatsisartuni ukiaanerani 2015-mi ataatsimiinnermi Naalakkersuisut siunnersuisoqarfimmik inunnik akiitsoqartunik siunnersuisinnaasumik ikiuisinnaasumillu pilersitsinissamut periarfissat pillugit nalunaarusiornissaq pillugu peqquneqarnissaannik Inatsisartut aalajangiiffigisassaattut siunnersuummik saqqummiussivugut. Siunnersuuteqarnitsinni siunertaq tassaavoq akiitsut annikillisarniarlugit immikkut ilisimasallit ikiortigalugit akiitsoqartunik akeqanngitsumik siunnersuisarnissaq. Eqqarsaatitsinniittoq tassaavoq aningaasaqarnikkut siunnersortimik, tarnip pissusaanik ilisimasalimmik, isumaginninnikkut siunnersortimik allatigullu ilisimasalinnik inuttalimmik sullissivimmik pisariaqartitsivugut. Siunnersuut akuerineqarpoq maannalu akiitsut pillugit nalunaarusiaq naammassineqarsimavoq tassanilu takusinnaavarput Kommune Kujallermi INI A/S suleqatigalugu ineqarnermut akiitsut pillugit misileraasoqarnissaa innersuussutigineqarmat.

Inuit Ataqatigiit akiitsut pillugit siunnersuisarfimmik peqalernissatsinnik siunnersuuterput attapparput. Taama ilinikkut aatsaat pisortanut akiitsoqarujussuarneq qaasiortumik suliniuteqarfigiinnarnagu sukumiisumik suliniuteqarfigisinnaavarput, ilaqutariit inuillu aningaasaqarnikkut inuttut siunnersorneqarnissaminnik pisariaqartitsisut ajornartorsiutaannik ikiorserlugillu inuuninarnikkut ikorfartorsinnaassagatsigit.

Akiitsoqarneq pillugu suliniutit pillugit oqallinnissamut piareersimavugut

Inuit Ataqatigiinnit Akiitsoqarneq pillugu suliniutit pillugit oqalliseqataanissamut piareersimavugut. Suliniut pisariaqassaaq, kisimiitinneqassanngilarli. Suliniutit minnerpaamik marluutillugit ataqatigiissakkamik iliuuseqartoqarnissaa kissaatigaarput, pisortat inissiaatinik ingerlatsiviutai suleqatigalugit misileraaneq siammasinnerulersillugu pisortanullu akiitsoqarnerit kommunillu tamakkerlugit suliniuteqarfigalugit.

Taamaammat akiitsoqarneq pillugu suliniutit qanorpiaq katiterneqarnissaa pillugu oqallinnissamik kaammattuerusuppugut. Ilanngaassiviup innuttaasunut pisortanut akiitsulinnut taamaallaat atuunnissaa ammaffigaarput, pingaarnertulli innuttaasut akiitsullit qanimut siunnersorneqarlutillu isumaginninnikkut suliniuteqarfigineqarnissaat Ilanngaassiviup saniatigut aamma aallartinneqarnissaa ilungersuutigissavarput.

Suliaq pingaarutilik oqallisigissallugu qilanaarpugut

 

Bendt. B Kristiansen

Politikkikkut oqaaseqartartoq, Inuit Ataqatigiit

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl