Qinigassaqarpugut

2013-mi arlariitsigut qinigassaqarpugut. Ukiup affaata siulliup ingerlanerani politikkikkut qinigaaffiusinnaasunut tamanut qinersinerit aqqusaartussaavagut, inunnik sinniisoriumakkatsinnik qinersilluta. Inunnilli partiinillu ataatsiakkaanik qinersinerup saniatigut suli pingaaruteqarnerusumik qinigassaqarpugut, tassalu inuiaqatigiittut sumut ingerlassanerluta qinersinitsigut aalajangertussaallutigu.

Sammiviit toqqarneqarsinnaasut marluusutut oqaatigineqarsinnaapput. Siulleq tassaalluni inuiaqatigiit kalaallit nukittoriartornitta sutigullu tamatigut namminiileriartornitta qasukkarani nanginneqarnissaa. Aappaatullu; qanga pissutsinut utersaariasaarsinnaaneq.

Inuit Ataqatigiit-nnut sorleq toqqassallugu nalorninanngilluinnarpoq!

Innuttaasunut neqeroorutit kiffartuussinerillu attatiinnarsinaassagutsigit – atuarfeqarneq isumannaatsumik ineriartortissagutsigu, utoqqartavut pitsaasumik isumagisinnaajumagutsigit, napparsimasut akeqanngitsumik suli katsorsarsinnaajumagutsigit allarpassuillu akissaqartikkusukkutsigit taava aningaasarsiornikkut immitsinnut annertunerungaartumik pilersorsinnaasariaqarpugut.

Suliffissat nutaat pilersinneqartariaqarput tamannalu anguniarlugu aatsitassarsiornermi sulisussat piukkunnarsarneqarnerat nanginneqassaaq.

Aalisarnerup nutarteriffigineqarnera nangittariaqarpoq – nunatsinni inuussutissarsiutit pingaarnersaat isumannaatsumik ullutsinnullu naleqquttumik pissarsiffiunerpaamillu ingerlanneqartariaqarpoq.

Pisortani ingerlatseriaaseq allanngortinneqartariaqarpoq, ineqarnermi aaqqissuussineq, akileraartarneq tapiissuteqartarnerlu allanngortinneqartariaqarput, pisariaqartitsinerpaat salliutinneqarlutik.

Meeqqat atuarfiat malunnaatilimmik pitsanngorsaavigineqartariaqarpoq, meeqqat siunnersorneqarnikkut pitsaanerusumik neqeroorfigineqartariaqarput, ilinniaqqinnissamullu angusat qaffasinnerusariaqarlutik.

Nunalerineq uumasuuteqarnerlu nutarteriffigineqartariaqarput. Kujataani periarfissat annertusaavigineqartariaqarput. Aatsitassarsiorneq kisiat eqqarsaatiginagu inuussutissatigut sutigut tamatigut ineriartortitsineq pimoorullugu aallartittariaqarpoq.

Tassa namminersornerup namminiilivikkusunnerullu anersaava!

Anguniakkavut suleqatigiilluta pimoorussillutalu malersussavagut akimmiffiit tunniutiinnarfiginagit – kisianni upperalugu pisinnaagatta piumallutalu!

Inuit Ataqatigiit piareersimapput!

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl