Partii nutartertoq, nukiit ataatsimoortut

6. juni 2014 

Partii nutartertoq, nukiit ataatsimoortut

Inuit Ataqatigiinni siulittaasunngortutut siulittaasullu tulliatut immikkut ittumik ataatsimeersuarnerup naammassilluarnera nuannaarutigalugu politikkikkut sule-qatigiilluarnissarput qilanaaraarput. Nukivut suleqatigiissillugit Inuit Ataqatigiit politikkiat tunngavigalugu inuiaqatigiinnut iluaqusersuissaagut. Ataatsimoorneq, suleqatigiinneq siunnerfinnillu anguniagaqatigiinneq aallartereerparput.

Nuannaarutigaarput immikkut ittumik ataatsimeersuarnitsinni aallartitanit tamatta tunuliaqutserneqarluarluta taaneqaratta. Partii ataatsimoortoq, nutartertoq nukiillu kattullugit ingerlaqqittussanngortoq siuttuuffigissallutigu piareersimalluinnarpugut.

Ukiuni makkunani Nunatta Naalakkersuinikkut aningaasaqarnikkullu inissisimanera nalorninartortaqarpallaarlunilu ataatsimoortitsinngippallaarpoq. Naalakkersuinikkut Nunatta ingerlanneqarnera patajaattunngorteqqissallugu aqqummullu eqqortumut nunatta inisseqqinnissaa sulissutigeqqissallutigu Inuit Ataqatigiit piareersimalluinnarpugut.

Nunatta isorartunera inoqarfiillu assigiinngiiaarnerat nukittut atussavarput, assi-giinngisitaarneq inissaqartillugu, nunaqarfimmiut illoqarfimmiullu tusaallugit. Siornatigut torrallannerliukkat qanoq aaqqinneqarnissaat periusissiorpavut. Aaqqiissutissallu sinerissami inuit ilisimalissavaat, tamanna pissaaq inuit tikillugit paasissutissanik suliassanillu avitseqatiginerisigut.

Isorliunerusut politikkikkut isumagineqarnerunissaat partiitut sulissutigissavarput. Nunaqarfiit illoqarfiillu minnerit inuussutissarsiornikkut, isumaginninnikkut allatigullu siuarsaanissamik siunnerfinnik tamatigut piorsaaviginissaat siunniupparput.  Meeqqat, inuusuttut, inersimasut utoqqaallu inuunerinnissaat, inoqarfimmi sorlermiinneq kommunemulluunniit sorlermut ataneq apeqqutaatinnalugu, Inuit qitiutilluinnarlugit sulissaagut.

Siulittaasutut siulittaasullu tulliatut ataatsimut nukittuffivut siammasipput Inuit Ataqatigiinniillu politikkikkut sulinitsinni Nunatta innuttai ataatsimoortinnerulissallugit qularinngilarput. Naalakkersuinikkut ingerlavik nalorninanngitsoq politikkikkullu ingerlatsineq patajaatsoq tunniussassaraavut.

Peqatigiilluta sulinissatsinnut nukivut atussavagut, suleqataajumasut tamaasa tikilluaqqullugit. Inuiattut ataatsimut katersuuffeqarnissarput pingaartipparput, aamma inuit siunnerfeqartumik suleqatigiisillugit angusaqassaagut.

Inuit Ataqatigiit immikkut ittumik ataatsimeersuarnitsinni ataatsimeersuariat  partiimilu ilaasortaqativut, immikkoortortaqarfinnit aallartitat, nunaqarfinni, kommuneni inatsisartunilu qinigaatitavut, minnerunngitsumillu namminneq kajumissutsiminnik ikiuuttorpassuavut nipilersortuvullu qamannga pisumik qutsavigaagut.

Ataatsimeersuarnitta ataatsimoorfiulluarnera partiimik nutartertumik kinguneqassaaq. Nukivut ataatsimoortillugit angussavarput – inuiaat nunaminni ataatsimut siuarsarnerat.

Sara Olsvig, Siulittaasoq​
Aqqaluaq B. Egede, Siulittaasup tullia

 

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl