Oqaloqatigiinneq maanna pili!

Inuussutissarsiornermut Aatsitassaqarnermullu Naalakkersuisumut allakkat ammasut

Asasara Jens-Erik Kirkegaard,

Inuussutissarsiornermut Aatsitassaqarnermullu Naalakkersuisutut akisussaaffimmik annertuumik tigummiaqarputit. Suliassannut annertuumut tunngatillugu paasilluarsinnaavakkit. Oqitsuunngilaq soqutigisallillu assigiinngitsorpassuit eqqarsaatigisussaavatit.

Qaammatit 15-it matuma siornatigut aatsitassat tungaasigut oqaloqatigiinnerup ammaffigeqatigiinnerulllu pitsanngorsarneqarnissaa anguniarniarlugu qineqqusaarputit. Tamannalu suliniutiginiakkanni pingaarnersaavoq. Inatsisartunuinnaq isinngilatit Naalakkersuisunili ilaasortatut aamma toqqagaavutit. Taamaasillutillu suliniutiginiakkatit toqqaannartumik aallussinnaalerpatit. Pilluarit! Kikkut tamarmik taamatut iluatsitsitigineq ajorput illillu immikkut pisinnaatitaalerputit.

Naggataatigullu qineqqusaarnermi neriorsuutivit ilumut eqqortissimanerinut qinersisartut naliliisussaapput. Uanga nammineq isumaga naapertorlugu suli takutitassaqarputit.

Isumaga naapertorlugu iliuutsinni kukkuluttorfiusoq kingulleq tassaavoq aatsitassanut inatsimmut allannguineq kingulleq. Tusarniaanermi sapaatit akunnerinik tallimanik piffissaliillutit dokumentini aalajangersimasuni allagaatinik takunnissinnaatitaanissaq atuutissanngitsoq aammalu innuttaasut naammagittaalliorsinnaanermut periarfissaasa atuutinngitsoortinneqarnissaannik siunnersuuteqarputit. Soorli tamanna pisariaqalersimanersoq oqaatsimik ataatsimilluunniit ilinnit tusagaqarfiginngilarput.

Inatsit pillugu tunngavilersuutinik paasisaqarusukkaangatta inatsimmut oqaaseqaatit atuarsinnaasarpagut. Tassuunali ilisimasaqarnerulinngilagut. Allagaatinik takunnissinnaatitaanerup killilersorneqarniarneranut tunngavilersuut ersernerluppoq, naammagittaalliorsinnaatitaanerullu peerneqarnissaanut tunngasoq eqqaaneqarsimanani. Tamannalu pivoq naak inatsisinut siunnersuutit kingunerisassaannik innuttaasunut nassuiaassinissaq Naalakkersuisunit piumasaqaataagaluartoq. Taamaattorli  naammagittaalliorsinnaatitaanerup peerneqarnissaanut tunngasoq taaneqarsimanngilaq.

Taamaattumik Naalakkersuisunut ilaasortatut innuttaasut peqataatinneqarnissaannut ammasuunissallu pingaaruteqarneranik oqalunnerit imaqanngitsutut ippoq.

Isumaqarpunga akisussaaffeqarfimmi tassani Naalakkersuisutut naammagittaalliorsinnaanermut periarfissap atuutinngitsoortinneqarnissaanut allagaatinillu takunnissinnaatitaanerup killilersuiffigineqarnissaanut tunngavilersuutivit oqaluttuarinissaat pingaaruteqartoq. Taamaattumillu tamanna pillugu ammasumik oqaloqatigiinnissamut qaaqquakkit. Imaassinnaavormi oqaluttuarinngisannik taamatullu paasinngisatsinnik naapertuuttunik tunngavilersuutissaqaraluartut. Tamatta, politikeriugutta, NGO-jugutta imaluunniit innuttaasuugutta soqutiginnittut, isummersorfigisinnaasatsinnik akineqarnissara qilanaarivara.

Pitsaasumik ammasumillu oqaloqatigiinnissamik kissaateqarlunga,

Naaja H. Nathanielsen, Inatsisartuni ilaasortaq, Inuit Ataqatigiit

 

Inatsimmut siunnersuut

http://naalakkersuisut.gl/~/media/Nanoq/Files/Hearings/2014/Forslag_aendring_raastofloven/Documents/Pkt%20xx%20EM2014RstoflovLOV28GRL.pdf

http://naalakkersuisut.gl/~/media/Nanoq/Files/Hearings/2014/Forslag_aendring_raastofloven/Documents/Pkt%20xx%20EM2014RstoflovLOV28DK.pdf

Inatsimmut oqaaseqaatit

http://naalakkersuisut.gl/~/media/Nanoq/Files/Hearings/2014/Forslag_aendring_raastofloven/Documents/Pktxx_EM2014_Rstoflov_BEM28_GRL.pdf

http://naalakkersuisut.gl/~/media/Nanoq/Files/Hearings/2014/Forslag_aendring_raastofloven/Documents/Pktxx_EM2014_Rstoflov_BEM28_DK.pdf

 

 

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl