Olsvig: Inatsisitigut ataataqanngitsunut suliaq saammaasseqatigiinnissamuttaaq tunngasuuvoq

Tusagassiorfitsigut nalunaarut

9. april 2014

 

Olsvig: Inatsisitigut ataataqanngitsunut suliaq saammaasseqatigiinnissamuttaaq tunngasuuvoq

 

Inuit Ataqatigiit Naalakkersuisut siulittaasuaq Inatsisinut ataatsimiititaliami inatsisitigut ataataqanngitsunut suliaq pillugu isumasiorneqarnissaanut qaaqqoqqippaat. Isumasiuineq sisamanngornermi apriilip 10-ni ullaakkut pissaaq.

 

Isumasioqateqarnermi inatsisitigut ataataqanngitsut pillugit inatsit atuutilerpat Naalakkersuisut tigussaasumik qanoq iliuuseqarniarnerannik Naalakkersuisut Siulittaasuat Inuit Ataqatigiinniit isummeqquneqassaaq. Tassaniippormi suliassaq annertooq Inuit Ataqatigiit isumaat naapertorlugu saammaasseqatigiinnissamut ataatsimiititaliarsuup ilagisariaqagaa.

 

”Inatsisitigut ataataqanngitsunut tunngasoq oqaluttuarisaanitsinnit suliassatta ilaattut tigussaasumik assersuutissaavoq. Tassani saammaasseqatigiinnissaq pineqarpoq. Aammattaaq inatsit atuutilerpat inatsisitigut nutaamik inissisimalernerup kingunerisaanik innuttaasut ikiorneqarnissamik paasissutissinneqarnissamillu pisariaqartitsiumaartut eqqarsaatigalugit pisortat tungaanniit qanoq ikiuinissaq pillugu Naalakkersuisut pilersaarummik qulakkeerinnittariaqarput”, Sara Olsvig oqarpoq.

 

Taarsiivigineqarnissaq suli oqallisigineqassaaq

Naalakkersuisut januarip naanerani nalunaarput taarsiivigineqarnissamut apeqqut pillugu danskit naalakkersuisuinik oqaloqateqartoqaqqissasoq.

 

”Taamaattumik Naalakkersuisunik isumasioqateqarnissamut qaaqquseqqippunga. Pisami Naalakkersuisut qanoq pilersaaruteqarnerat assut paaserusupparput. Taarsiivigineqarnissamut apeqqut danskit naalakkersuisuinik oqaloqatigiissutigineqassava?”, Sara Olsvig aperivoq.

 

Inatsisartut ilisimatinneqassapput

Isumasioqateqarnermittaaq Inatsisartuni partiit pisamut tunngasunik tamakkiisunik paasissutissinneqarsimanissaat qulakkeerniarneqarpoq. Januarimissaaq Naalakkersuisut Siulittaasuat nalunaarpoq ”Siumut isigisumik Nunatsinniit suliamut attuumassuteqartut tamarmik ingerlaavartumik malinnaatinneqartuassapput, taakkununnga ilaallutik Folketingimut ilaasortaatitagut, suliap unigani pitsaasumik ingerlanissaanut ikorfartueqataassagamik.”

 

”Naalakkersuisullu Siulittaasuannik pitsaasumik eqqartueqateqarnitta ingerlateqqinnissaa aammalu januarimili suliami qanoq pisoqarsimaneranik  ersarissunik Naalakkersuisuniit isumasiuinermi akineqarnissarput qilanaaraara” Sara Olsvig itisiliivoq.

 

Attavigisassaq: saol@ina.gl +299 526858

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl