Naartuninnik pilluarit – naartunissannulli akissaqarpit?

 Nuuk, 4. april 2014

 

Naartuninnik pilluarit – naartunissannulli akissaqarpit?

 

Allattoq Naaja Hjelholt Nathanielsen, Inatsisartuni ilaasortaq, Inuit Ataqatigiit

 

Aprilip aallaqqaataani Naalakkersuisut siulittaasuat Aleqa Hammond facebook-ikkut quppernermini unnerpoq naartulluni oktoberimilugooq erninermi sulinngiffeqarluni aallartissalluni. Taamatut salloqittaanera isumassarseriataallaqqissutsimik immini ersersitsinngikkaluartoq, atagu tusagassiaq ilumoortuuneraasuusaarlugu takulaartigu qanoq pissarsiaqarfigilaarsinnaanerlutigu.

 

Juumooqarneq juumooqannginnerluunniit

Nunap siuttua ilumut naartusimagaluaruni iluatsitsissaqqooqaaq illoqarfimmi najugaqarfigisamini ernisinnaagaluaruni. Arnalli tamarmik taama iluatsitsitigineq ajorput. Illoqarfimmut allamut erniartortariaqartarput. Ilarpassuisalu erninerup nalaani immikkut misinnartaqisumi aappatik aamma najortigisinnaaneq ajorpaat. Tamanna anaanaasumut ataataasumullu erloqinartuusarpoq. Aleqa Hammond naartusimagaluaruni periarfissaqarsimassagaluarpoq naartutilluni juumuumit malittarineqarnissaminut. Tassanili aamma arnat tamarmik taamatut misigisassaqartitaaneq ajorput. Naartutillunimi juumuumit malittarineqarneq toqqissisimalersitsisuusaraluarpoq.

 

Illoqarfimmiuuneq nunaqarfimmiuunerluunniit

Aleqa Hammondili arnaanngilaq inuttut ikiorserneqarnissaminik pisariaqar-titsisoq. Taamaassimasuugaluaruni periarfissaqarsimassagaluarpoq naartutilluni suliaminnut pikkorissunut atassuteqarnermigut anaananngornissaminut piareersarnissaminut, tassuunalu inoorlaarlu inuunermi aallartilluarsinnaassallutik. Siusinaartumik iliuuseqarneq sumiluunniit pingaaruteqarluinnaqqissaartutut taakkartorneqartarpoq, illoqarfinnili annerusuni atuutsikkuminarnerujussuusarluni. Angajoqqaanngortussat inuttut ikiorser-neqarnissaminnik pisariaqartitsisut naartorlu suli inunngunngitsoq taamaasillutik suli inuttut ikiorserneqarnissaminnik pisariaqartitsinerulersarput – nunaqarfimmi najugaqarunik.

 

Akissaqarpit naalungiarsuup timikkut pisariaqartitai isumagissallugit

Meerartaarneq nuannaarutissaavoq. Inuunerisaq ajunngitsut ajortullu assigiimmik atortillugit allanngortinneqartarpoq. Naalungiarsummut akisussaaffeqalernikkut inuuneq erlinnarnerulersarpoq. Erninikkulli isumakuluutissat assigiinngitsut aamma takkussuutilersarput, soorlu aningaasaqarniarnikkut. Nerisassanut, atisanut, pinngussanut, sunngiffimmi sukisaarsaatissanut, inuuissiortitsinissanut, feriarnissanut, ulluunerani paaqqinnittarfinnut akilersuutissanut il.il. akissaqarnerluni ullut tamaasa eqqarsaatigisariaqartarpoq. Aningaasaqarniarnikkut tulleriissaarinermi eqqarsaatigisassat naaffeqanngiusaartutut ittut takkussuutilersarput.

 

Erninermi aningaasaateqarfiliornissamik isuma sulisitsisut sulisartullu ammaffigaat

Erninermi aningaasaateqarfik pillugu siunnersuutiga qaammat ataaseq qaangiuppat Inatsisartut inaarsartussaavaat. Siunnersuut napertorlugu Naalakkersuisut peqquneqarnikuupput erninermi aningaasaateqarfiliortoqarsinnaaneq pillugu sulisitsisunik sulisartunillu oqaloqatiginnissasut. Tassungalu atatillugu oqaatigisariaqarpoq taama ittumik aningaasaateqarfiliortoqarsinnaanerup sukumiinerusumik oqallisigineqarnissaanut sulisitsisut sulisartullu ammasuunertik siusinnerusukkut nalunaarutigereernikuum-massuk.

 

Naalakkersuisut partiillu Naalakkersuisuutitaqartut siunnersuummut akerliupput

Siunnersuulli ukiarmi siullermeerneqarmat Naalakkersuisut partiillu Naa-lakkersuisuutitaqartut ajoraluartumik akerliliipput. Partiit Naalakkersuisuu-titaqartut akerliunerat eqqumiippoq pissutigalugu siunnersuut qinigaaffiup siuliani Inatsisartut tamarmiullutik akuerinikuusaata oqaasertaasoqqinnaaq oqaasertaqarmat. Qinersitsisoqarnerali pissutaalluni piviusunngunngitsoorpoq. Maannali qinersinerup kingorna erninermi aningaasaateqarfik pillugu sukumiinerusumik oqaloqataanissamut partiit Naalakkersuisuutitaqartut akerliuleriataarput.

Tamannali Aleqa Hammondimut imatut pingaaruteqarnavianngilaq tapisiartaat ilanngunnagit akissarsiarissaartuugami. Qujanartumilli erninermi malittarisassat pitsaasut tulleriissaarinerminni salliutillugit kattuffiit assigiinngitsut isumaqatigiissusiorfigereersimavaat. Isumagali malillugu kiserngoruttut tapunneqarnissaat pisariaqarpoq suliaqaqatigiinnut sorlernut atanerput apeqqutaatinnagu erninermi aningaasatigut killiliussatut sinaak-kutarissaarnerulernissarput anguniarlugu. Pitsanngorsaariarfissaqarpoq. Aamma pisariaqarpoq erninermi malittarisassat pillugit suliaqarfiit angutit suliaqarfiginerusaasa oqalliseqataanissaat. Taamaammat neriuppunga siunnersuutip majimi aappassaaneerneqanngilaattaani partiit Naalakkersui-suutitaqartut isumartik allanngortikkumaaraat.

 

Erninermi aningaasaateqarfik ilaqutariinnermut politikkitsialaavoq

Erninermi aningaasaateqarfiliorneq ilaqutariinnermut politikkip meeqqanut ilaqutariinnullu meeralinnut akisussaassuseqarfiliortup tungaanut alloriarnerussaaq. Taava tassanngaanniit immikkoortut allat assigiinngitsut suliarilersinnaanngussavagut meeqqat ilaquttami akornanni inuulernissamut pitsaasumik aallartinnissaat qulakkeerneqarsinnaaqqullugu.

Qaa taamaasiorta peqatigiilluta isumaqatigiillutalu.

 

Annertunerusumik paasisaqarusukkuit attavigiuk Naaja H. Nathanielsen,  mobil: 54 89 81

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl