Naalakkersuisut mittarfiit inissianit nutaanit pingaartinneruaat

Naalakkersuisut Qaqortumi mittarfik, ukiorpassuarni inissaminnik utaqqisut ikilisarnissaannit pingaartinneruaat.
”Pingaarnersiuineq apeqqutaavoq”, Aningaasaqarnermut Nunamullu Namminermut Naalakkersuisoq, Vittus Qujaukitsoq oqarpoq.
Taama oqarpoq, Naalakkersuisut 2015-imut Aningaasanut Inatsisissatut siunnersuutertik marlunngorneq 19. august 2014 saqqummiummassut.
Pingaarnersiuineq apeqqutaalluni? Aap, qujanaq! Pingaarnersiuineq kukkusoq! Aningaasanut Inatsisissatut siunnersuummi ilaatigut takuneqarsinnaavoq, inissianik sanaartornermut aningaasaliissutissat ukiut sisamat ingerlanerini 400 million kr.-inik annikillisinniarneqartut, taakkununngalu amerlanerpaat Qaqortumi mittarfissamut nutaamut atorniarneqartut. Inissianik sanaartornerup annikillisinneqarnerata ilaatigut kingunissavaa, kommunit inissianik sanaartornerinut tapiissutaasartut ikilisinneqarneri.

Naalakkersuisut taamaalillutik ilisimaaralugu inissialiorneq annikillileriffigaat, Qaqortumi mittarfissaq akissaqartinniarlugu. Ulloq taanna Aningaasanut Inatsisissamut siunnersuutip saqqummiunneranut atatillugu Vittus Qujaakitsoq Nuuk-TV-kut aamma nassuerpoq: ”Ilumoorpoq ataatsimut isigalugu inissialiornermut aningaasaliissutit annikillisinniarpagut.” Nangipporlu: ”Inissiat aserfallassimapput. Naalakkersuisut suliassaraat inissiat aserfallakkaluttuinnannginnissaat, sapinngisamillu inissiat nalingi apparatillu aserfallavinnginnissaat, tamatumalu qulakkeernissaa.”

Tamanna nassuerutiginninnertut taaneqarsinnaavorluunniit! Eqqarsariaallannanngitsuunngilaq taama imminut illersorpalaartumik oqaaseqarnera. Inissialiornermut aningaasaliilluannginnermikkut Naalakkersuisut takutippaat inuiaqatigiinni suliassat pingaarnerpaat ilaat: Inuit tamarmik inissaqarnissaat.
Ilisimatusarfimmi misissuinerit takutikkaluarpaat, inuit Kalaallit Nunaata kujataaniit nutserartut, nutsertullu Nuummut nuuttartut. Naalakkersuisut tamatta aningaasaatitsinnik pingaarnersiuinerat, siunissami nunatsinni najugaqarfiit inissisimanerannut tulluanngilaq. Misissuinerummi aamma takutippaa, annertuumik illoqarfinnut nutserartoqartoq, tamannalu atugaaleraluttuinnartoq. Tamanna aamma pissutaalluni Tasiilaq inuttusigaluttuinnarpoq.

Naalakkersuisut tamanna qaqugu paasissavaat? Inuit takorluugaannik arsaarneqarsinnaanngillat. Inuit naatsorsuutigigaagamikku takorluukkatik nuuffigisaminni angusinnaallugit, taava nuuttarput.
Qanorluunniit inissaqarunik inissaqanngikkunilluunniit. Ukiut 40-it sinnerlugit inissaqarnermut politikki kukkusoq maanna ingerlaqqiinnarpoq.

Pigisat maangaannartinnissaat pinaveersimatinniartigu, ilaatigummi Norgemiut avinngarusimasuni pitsaanngitsunik misilittagaqarput, tassami illorpassuit maanna inoqaratik napaannarput.
Illuliortoqarniarli utaqqisut amerlanerpaaffiini. Inuillu najugaqarfigerusutaanni.

Inuulluaqqusillunga

Allan Pertti Frandsen, Inuit Ataqatigiit
Kommunalbestyrelse-mut ilaasortaq, Sanarfinermut avatangiisinullu ataatsimiititaq, Kommuneqarfik Sermersooq
Postadresse: Timerlia 46,
3905 Nuussuaq, Greenland
Mobil +299 598755
apfr@sermersooq.gl
www.facebook.com/ia.pertti

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl