Naalakkersuisoqatigiit allat siunnersuutaat soqutiginngilaat

Naalakkersuisoqatigiit allanit siunnersuutigineqartunik paasiniaasarnissaminnut piumassuseqannginnerat Inuit Ataqatigiinni uggorivarput. Taamatuttaaq pissaa-nerup pingasoqiusanngorlugu avinneqarnerata ataqqineqarnissaa ujartorparput. Pissutsit maannakkut atuuttut qiviaraanni Inatsisartuni naalakkersuisooqqatigiit ilaasortaatitaat Naalakkersuisunut anngaaginnartuupput.

 

Naalakkersuisoqatigiit oqallinnerit matuunnartarpaat

2013-imi Inatsisartunut qinersinerup kingorna qinersisartut oqartussaaqataanerat naalakkersuisoqatigiinnit taamaallaat kikkut amerlanernik Inatsisartunut qinerneqarsimanerinik tunngaveqartinneqarluni paasineqarsimanera taamaal-laallu taama isiginiarneqarnera ersarissiartuinnarsimavoq. Aamma ataasiaannaratik amerlanerussuteqarnertik atorlugu oqallinnissaagaluanik mattussiinnartarnermikkut pissaanermik tigummiagaqarnerminnik nittarsaaniarneq naalakker-suisooqqatigiit pingaartilluinnartarsimavaat. Inuit Ataqatigiinni arlaleriaqaluta eqqarsartarpugut naalakkersuinikkut oqallinneq atorunnaartinneqavissimasoq. Taamallaat pissaanermik nittarsaassiniarneq kiserngoruppoq, taamaaliornikkullu qinikkat innuttaasullu akornanni tatigeqatigiinneq siuarsarneqarunnaavilluni. Taamaaliornikkut unammisassat annertuut tamatta – partiimut sorlermut ataner-put apeqqutaatinnagu – ataavartussamik inernilerlugit iliuuseqarfigisassaagaluavut naammassinngitsoorneqartarlutik. Tamattami nunatsinni inuiaqatigiinni akuuvugut – piffissanilu ajornartorsiorfiusuni tamatta eqqugaasarluta.

 

Oqaatsit atugaat ingasatsikkiartuinnarput

Naalakkersuisut akissuteqaasiortarnerminni oqaatsit atugaat ingasatsikkiartuinnarput. Illuatungiliuttunit siunnersuutigineqartut piaaraluni paatsoorneqartarput, taamatullu ileqqorlunnertut imaluunniit nunatta ineriartorneranik sequtserinissamik siuarsaasutut isiginiarneqartarlutik. Oqaatsit atorneqartartut tassaanngillat oqallinnermut atatillugu ilumoorluni tunngavilersuutaasut, paarlattuannilli tassaallutik oqarluartaarnerit kamammik akoqartut, taamaallaallu nikanarsaani-arnermik siunertaqartut. Taama avaanngunartumik nipilimmik pissusilersorneq Inatsisartut Naalakkersuisullu akornanni kinguneqarluartumik suleqatigiinnissamut kaammattuutaanngilaq.

 

Illuatungiliuttut kissaateqartarnerat tusaanngitsuusaarneqartarput

Ajoraluartumillu naalakkersuisoqatigiit Inatsisartuni ilaasortaatitaat Naalakkersuisunik malinnaaginnaavipput. Illuatungiliuttut siunnersuutaat paatsoorneqartarput. Piaarinerusinnaavoq, imaluunniit imaassinnaalluni siunnersuutigine-qartut naalakkersuisoqatigiinnit iluamik paasiniaaviginiarneqartanngitsut. Ataatsimiititaliani sulineq naalakkersuisoqatigiit pilersaarutiminnik piviusunngortitserusunnerinik annertuumik sunnersimaqqavoq, tamannalu illuatungiliuttut apeqquteqartaraluarpata imaluunniit taamaattoqanngikkaluaraangat pisarluni. Naalakkersuisut Inatsisartullu akornanni oqartussaaqataanikkut inissisimanissaagaluaq Naalakkersuisooqqatigiit Inatsisartuni ilaasortaatitaannit suu-supagineqarpoq. Inatsisartut ima oqartussaaqataajunnaalersimatigaat Naalakkersuisut qimmiaraattut sungiussipilutsitaasutut inissisimalersimallutik. Paasissutissanik pissarsiniarnissanut, kattuffinnik oqaloqateqarnissanut ataatsi-miititalianilu ataatsimiinnissanut illuatungiliuttut kissaateqartarnerat tusaanngitsuusaarneqartarput. Tamanna qasunarpoq, taamatullu innuttaasut oqartussaaqataanerannut aporfissaqartitsilluni.

 

Immitsinnut tusarnaartarnissatsinnik pisussaaffeqarpugut

Inatsisartunut qinigaaneq tassaanngilaq kisimi naammagisassaq. Qinigaaneq imaanngilaq naassaangitsumik pissaaneqalerneq. Innuttaasut sullinnissaannik pisussaaffeqarpugut – taamatut aamma innuttaasunik uatsinnik qinersisiman-ngitsunik. Taamatullu immitsinnut tusarnaartarnissatsinnik pisussaaffeqarpugut – aamma uatsinnit allatut eqqarsaatersortunik tusarnaarnissatsinnik.

 

Suleqatigiinneruneq innuttaasunit ujartorneqarpoq

Suleqatigiinneruneq innuttaasunit ujartorneqarpoq. Pissaaneqqusaannerit pissaanermillu nittarsaaniarnerit soqutaanngitsut kimulluunniit iluaqutaanngillat. Taamaallaallu partiit akornanni avissaartornerulernissamut aqqutissapput, taa-matullu partiit uagullu qinikkat akunnitsinni immitsinnut tatiginnginnitta anner-tusiartornera kimulluunniit iluaqutissartaqanngilaq. Unittariaqalerpoq. Inatsisartunik ataqqinninneq utertinniarsariniartariaqarparput. Uagut suliassarput tassaavoq Inatsisartut pitsaanerpaamik sulinerannik qulakkeerinninnissaq. Tassanilu suliassanik ulikkaarpugut!

 

Inatsisartuni ilaasortaq Naaja Nathanielsen,

nana@inatsisartut.gl

mobil: 54 89 81

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl