Naalakkersuisooqatigiit uranimut killiliinissaq pillugu isumaqatigiinngillat

Innuttaasut taasitinneqarnissaat pillugu oqallinnermi taasititsisoqarnissamut akerliusut Nunatta patajaatsumik politikkikkut ingerlatsinissaa innarlerneqarsinnaanasoralugu itigartitsipput. Taamatulli oqaraanni akunnerminni isumaqatigiinnermik takutissisinnaasoqassagaluarpoq, oqallinnermili akerlianik pisoqarpoq.

Naalakkersuisooqatigiit akornanni patajaatsumik ingerlatsisoqarsimappat erseqqissumik oqarsinnaasussaagaluarput qanoq taava allatut iliuuseqarniarlutik. Naalakkersuisooqatigiimmi isumaqatigiissutaanni allassimavoq qummut nutaamik killiliissamaartut.

Oqallinnermi Inuit Ataqatigiit partiit aperivagut. Aperigatsigilli qummut nutaamik killiliinissaq pillugu akissutaat assigiinngeqaat. Atassut 0,05%-mik (500ppm) ulorianartunik qinngornertalinnik piiaanissamut qummut killiliiniarput, Siumut immaqagooq 0,1% (1000ppm) Demokraatillu immaqagooq 2% (20.000ppm).

Taama assigiinngitsigisunnik saqqummiussinerit naalakkersuisooqatigiit akornanni isumaqatigiinnginnerup qanoq annertutigineranik takutitsineruvoq tamannaannarlu innuttaasunik taasititsinissamut tunngavissaqqikkaluarpoq.

Avammut taamatut isumaqatigiinnginnermik takutitsineq aatsitassarsiornissamut aningaasaleerusuttunut tatiginnermik pilersitsinngilaq. Assigiinngilluinnartunik naalakkersuisooqatigiit akornanni oqaaseqarneq tatiginassutsimut innarliineruvoq annertooq. Inuit Ataqatigiit kaammattuutigissavarput naalakkersuisooqatigiit siunertarisaminnik erseqqissumik saqqummiussissasut.

Inuit Ataqatigiit isumaqarpugut innuttaasunik taasititsinissaq patajaassusermut uppernassusermillu aqqutissaasoq.

Múte B. Egede, Inuit Ataqatigiit

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl