Naak Angallannermut Naalakkersuisoq? Qaa nassuiaasoqarli!

Kujataani suliffissat 30-t atorunnaarsinneqarnissaat akuerineqarsinnaanngilaq. Naalakkersuisulli pisarnermisut nipaarullutik nassuiaassanatillu toqqorsimasutut sulipput. Naak Siumup Inatsisartunut ilaasortaatitai? Naak Atassut? Atassut tusarsaajunnaavilluni akisussaaqataajumanngitsutut pissusilersorluni tusagassior-fitsigut saqqumiunnaarpoq. Taakkuuppummi naalakkersuisooqatigiit tunuliaqutaat, Inatsisartunut ilaasortaasut akisussaaqataasut pisullu assigiinngitsut qanoq ingerlanerannut tunuliaqutaasut nassuiaassuteqanngisaannartulli.

Naalakkersuisooqatigiit Kujataani angallannerup isasuuissornissaa anguniavissimagunarpaat, inuillu silaannakkut assartuussinermik periarfissaarulluinnarnissaat siunnerfigineqarmat minnerpaamilluunniit naalakkersuisooqatigiit partiivisa qisuariarfiginngilaat. Pissutsit taamatut ingerlanerat akisussaassuseqanngitsumik aqutsinertut taasariaqarparput. Inuppassuit aalassassimaartinneqarput, pingaartumik nunatta kujasinnerusortaani inuit eqqarsaatigalugit. Qisuariartoqassananilu.

Kalaallit Nunaat inuiaallu kalaallit siunissami qaninnermi ungasinnerusumilu qanoq aaqqissuussat naalakkersuisooqatigiinnit anguniarneqarpat? Suniartoqartoruna? Naalakkersuinikkut suliaqartuusugut nunatsinnilu inuit isummersoqataanissatsinni qanoq naatsorsuuteqassaagut? Sooq taama tassanngaannartigisumik allannguinerit annertuut saqqummiunneqaqattaarpat? Naalakkersuisooqatigiit nassuiaanissaat pisariaqarluinnalerpoq. Inuppassuit nalornisillugit naalakkersuinikkut aqutsineq ingasappallaaleqaaq.

Inuit Ataqatigiit akuerisinnaanngilluinnarparput nunatta timmisartortitseqatigiiffiani sulisut 30-t soraarsitaasussanngorlugit inissinneqarmata. Akuerinngilarput suliffissaaleqinerup taama qaffasitsigisumik inissisimasup qaavatigut suli suliffinnik matooraanissamik naalakkersuisut siunnerfeqartut ilisimatinneqaratta. Inoqarfiit suulluunniit akornanni angallannikkut attaveqaatit ulluinnarni pisunut, inuillu inuunerminni atugarisaannut sunniuteqarluinnartuupput.

Imami pingaaruteqartigipput allaat aningaasarsiornikkut pissutsinut patajaassutsimullu annertuumik sunniuteqartarlutik, akileraartarnikkullu isertitat ajorsiartuinnannginnissaannut pingaaruteqarluinnarlutik. Taamaammat suliffiit 30-t atorunnaarsinneqarpata Kujataani akileraarutitigut isertitat sunnerneqartussaapput, illuatungaanilu isumaginninnikkut aningaasartuutit qaffassallutik.

Tamatuma malitsissaraa Kujataani imarpik qulaallugu mittarfiup kaaviaartitakinnerulernissaa, akiliisinnaassuseqartumillu imminut napatinneraata innarlernissaa. Tamakkua itisileqqinnerussanngilakka Inatsisartut ataatsimiinnissaat sioqqullugu. Ujartugarali aana, sooq naalakkersuinikkut pissutsit killiffiat, inuillu aalassassimaarnerat naalakkersuisooqatigiit arlaanaasaluunniit oqaaseqarfigisanngilaat? Inuppassuit ernumapput qisuariaateqartoqanngimmat. Ileqquulersimagunarpoq naalakkersuisooqatigiit ajornartorsiummik naapitaqaraangamik nipaarullutik isummersinnaatitaanatillu pisunik aniguiniarusaartarnerat.

Periaaseq tamanna takornartariunnaarparput, naalakkersuisooqatigiit partiivisa ileqquliuteqqammassuk oqaannartarlutik ”uagut partiimi uani qanorluunniit isummersinnaatitaagatta akerleriisinnaatitaagatta”. Oqaaseq takornartarinngeqisarput akisussaassuseqartumik naalakkersuinikkut ingerlatseriaatsimik qimarratiginnittuummat itinerusumik eqqarsaatigineqartarnerpa? Naluara. Ajornartorsiutilli anigornissaanut ajornartorsiutip qiterpiaa samminagu ”uagut imaappugumik” saqqummersitsinerinnaavoq.

Massakkulli ujartorpara naalakkersuisooqatigiit suniarnertik, aamma sooq Kujataani angallannikkut pissutsit periarfissaarutivinnissaannik siunertaqalersimanertik nassuiassagaat. Inuppassuit soraarsitassatut nalunaarfigineqarsimasut sal-lunaveeqqutitut nivinngartaarneqarnerat naalakkersuisooqatigiinniit kanngunaannartumik suli oqaaseqarfigineqanngilaq. Naalakkersuinikkut ingerlatseriaaseq isertuusserpalaartoq, allannguinerillu annertuut kingunissaannik erseqqissumik nassuiaaqqaaranilu  saqqummiussaqaqqaarani, tassanngaannaq aalajangersaatitsiniarnertut pissusilik qimanneqarluinnartariaqarpoq.

Naalakkersuisooqatigiit piaartumik nassuiaateqarnissaat allakkat ammasut aqqutigalugit kaammattuutigaara.

Attavigisassaq:

Inatsisartunut ilaasortaq Aqqaluaq B. Egede, Inuit Ataqatigiit, mobil: 56 27 66

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl