Meeqqanut tapit meeqqamut tapiutaalik – angajoqqaamut tapiutaanatik

Meeraq angajoqqaaminit pinngitsoorani sapinngisamillu isumagineqartussaavoq.

 

Angajoqqaaqarpoq imminnut najorunnaarnikunik, taamaasilluni angajoqqaaqarluni aamma meeqqamut tapiutinik angajoqqaamut akilersuisunik.  Angajoqqaalli ilaat taamaakkaluartoq meeqqanit minnerusumik annerusumilluunniit, ilaqutaasut aamma, meeqqamut pilersueqataasuusarput. Pilersueqataagaluarlutik akilersuisussanngortinneqartarput, akilersueriaaserlu tassaavoq angajoqqaamut meeqqamik najugaqatiginnittumut aningaasanngorlugu akilersuisoq, tassa kontoanut aningaasat nakkartinneqartarput. Tamannali meeqqamut tamatigut atorneqartarneri isumannaarutaanngilaq.

 

Periarfissaalertariaqarpoq akilersuisup nammineq aalajangissallugu meeqqani qanoq pilersussanerlugu, meeqqerivianut, ornittagaanut imaluunniit atisassaanik angalanermulluunniit akiliuttarnissaanut.

 

Angajoqqaat ilaqartartarput imigassamik allanillu atornerluisunik meeqqallu tapisiutaanik atuisinnaasartunik meeqqaminnut atunngikkaluarlugu, imaluunniit angajoqqaaqarpoq meeqqap atuarnerani allamilluunniit peqquteqarluni allami najugaqartarnera peqqutigalugu tapiutinik pisinnaanngitsunik.

 

Erseqqissassavara meeraq allami najugaqaraluarpalluunniit angajoqqaajusut pisussaatitaammata pilersuisueqataanissaminnut.

 

Illuatungaanut aamma saatsikkutsigu, angajoqqaaqarpoq aamma piviusumik meeraq ulluinnarni isumagisarinngikkaluarlugu tapisianik tigooraasut. Angajoqqaat pineqarput meeqqamut oqartussaasut meeqqami sumi najugaqarnissaannik aalajangiisuusussat, tamatigulli taakkuuneq ajorput ulluinnarni meeqqaminnik isumaginnittuusut.

 

Angajoqqaajusup meeqqamik tigumminnittup aalajangersinnaavaa meeraq sumi najugaqassanersoq. Imaanngilaq angajoqqaaqataasup meeraq oqaasissaqarfigiunnaaraa akisussaaffigiunnaarlugulu, tamattami meeraq akisussaaffigaarput meerarlu aamma oqartussaaqataasariaqarluni. Inatsisit Nunatsinnut atuutsinneqartut europamiunit sanarfineqarnikut tulluussorinngilakka. Nunatsinni ilaqutareeriaatsit ullutsinni allaapput, taamaammat piorsarsimassutsitsinnut tulluussartariaqalerput.

 

Angajoqqaaq pilersuisoq pisinnaatitaaffeqartariaqarpoq sutigut akilersueqataanissaminik aalajangeeqataalluni, taamaasilluni qulakkeerlugu meeqqap tapisiutini eqqortumik arlaatigut tigusalernissai.

Angajoqqaaq pilersuisussanngortitaq pisinnaatitaaffeqartariaqarpoq piviusumik pilersueqataaguni akilersuutimi uppernarsaataannik saqqummiussissalluni akilersuutaanillu ilanngarneqartarlutik.

Illuatungaanillu angajoqqaaq meeqqaminut tapiutinik tigusissartup meeqqani najugaqatiginngikkaluarlugu uppernarsarsinnaanissaa meeqqaminik isumaginnittartuulluni periarfissaqarfigisariaqaraluarpaa. Uani eqqarsaatigaakka ilagaat meeraq atuariartorluni imaluunniit innarluuteqarnerminik peqquteqarluni allami najugaqartariaqarnera. Imaammat inatsimmi angajoqqaaq meeqqamik najugaqateqartoq kisimi aningaasanngorlugit tapiutinik tigusisinnaatitaammat, naak piviusumik ilaatigut pilersueqataagaluarluni.

 

Ilisimavarput angajoqqaarpassuit, ingammik ataataasut, tapiutinik kommunerisaminnut taamannaannaq akiligassaqartut. Imaammat anaanaasup qinnutigisinnaammagit kommunikkoorlugu angajoqqaajusullu kommuni akilersulertussanngorlugu, akilersinnaanngikkunigillu akiliisitsiniartarfimmut nakkartarlutik. Akiliisitsiniartarfiup akilersuititsiniarnini iluatsinngikkuniuk akissarsiaanit ilanngaassuilertarput. Piviusumilli angajoqqaajusup meeqqani pilersuiffigeqataappagit? Naak adressemi najugaqatiginngikkaluarlugit (uani anaanaasup akisussaaffimmik tigumminnittup aalajangertarpaa meeraq sumi najugaqassanersoq) piviusumik najugaqatigippagit sinittarfeqartillugit ulluinnarnilu isumagisaralugit?

 

Ilimagilluinnaqqissaarpara angajoqqaaqartoq, piviusumik meeqqaminnik isumaginnittaraluarlutik meeqqamik najugaqatiginnissinnaatitaasumut akilersuisut, qularnaarneqanngikkaluartoq aningaasat meeqqamut tuttarnissai. Tamanna aaqqittariaqarpoq. Piviusumik angajoqqaarpassuit akiligassaat taamak annertutiginngikkaluarput. Angajoqqaaqarpormi meeqqaminnik isumaginnittunik saniatigullu angajoqqaaqataasumut akilersuisunik.

 

Aamma kommunimut pisortanut taarsigassaqarujussualertarneq annertooq ajornartorsiut annikillisarneqarsinnaalluarpoq tapiutinik akilersuisup aalajangeeqataaffigilersinnaassappagu meeqqat ulluinnarni atugaanut tapiutini qanoq atorneqalersinnaasuugaluarpata.

 

Suliniutigerusuppara meeqqanut tapinik akilersueriaatsip isumannaallisarneqarnissaa, qulakkeerniarlugu tapit meeqqamut tuttalernissaat.

 

Sulissutigerusuppara angajoqqaat periarfissaqalernissaat isumaginneqataagunik pilersueqataanerminnik uppernarsaasinnaanngussasut.

 

Sulissutigerusuppara meeraq sumiluunniit najugaqaraluarpat angajoqqaajusup pilersortuassagaa meeraq nammineq oqartussanngornissaata tungaanut.

 

Meeqqanut tapit meeqqamut tapiutaalik – angajoqqaamut tapiutaanatik.

 

Nunatsinni inatsisitsinni angajoqqaajusup meeqqaminik akisussaaffeqartup oqartussaatitaanera annertuallaaqaaq, meeqqap pisariaqartitai salliunneqartalertariaqarput. Meeqqap pisinnaatitaaffii aallaviulertariaqarput.

 

Inuit Ataqatigiit Inuit pisinnaatitaaffii, tamatumanilu meeqqat pisinnaatitaaffii tunngavimmisut suliniutigai.

Arnajaaq Lynge

Inuit Ataqatigiit sinnerlugit qineqqusaartoq

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 346 272
Fax: (+299) 321 321
Website: http://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl