KANUKOKA sumut atussagatsigu?

KANUKOKA sumut atussagatsigu?

Kommuneqarfik Sermersuumi innuttaasut kingumut Naalakkersuisunit tunulliunneqarput.
Tamatumuuna suliffissaqanngitsut eqqugaapput. Pingaartumik inuusuttut 18-iniit 24-inut ukiullit arnallu – kommunini allani sanaartugassanut aningaasartuutissanik ukkassinermi, suliffissaaleqinerup akiorniarneqarnerata aqqani tunulliunneqarput. Tamatumani Naalakkersuisuni partiit siuttuusut kommunillu sinnerini siuttuusut imminnut ataqatigiinnerat, annertuumik eqqarsarnartoqarpoq.

Naalakkersuisup Jens Erik Kierkegaard-ip Sermersuumi suliffissaqanngitsut Kommuni Kujallermi suliffissaaleqisunut ataasiakkaanut sanilliullugit 20.000 koruuninik annikinnerusunik aningaasaliiffigineqarnerannut nassuiaammini, Kommuneqarfik Sermersuumi sanaartornermut aningaasartuutissat atorneqanngitsut tunngavilersuutigai. Tamatumani imminnut attuumassuteqanngitsut kattunneqarput.

Naligiissaarineq aqqutigalugu tapiissuteqarnerup saniatigut – aperineqaqqaaratalu – Kommuneqarfik Sermersuumiit immikkut 20 mio. koruuninik tapiissuteqarpugut/nuna tamakkerlugu akileraarut ilaatigullu Nukissiorfiit aqqutigalugit miliuunerpaalunnik kommuninut allanut – nuannaarutigisatsinnik aningaasaleeqataasarpugut! Aningaasaleeqataanermili innuttaasut atugarliornerpaat eqqugaagaangata – saniatigullu qujattuissuseq ersersinneqarpat- nuannersueruttarpoq.

Nunatsinni kommunit sisamaasut tamarmik peqatigiiffimmi KANUKOKA-mi – soqutigisat tunngavigalugit ilaasortanik tamanik sullissinissamik salliussisussami- ilaasortaapput. Peqatigiiffiup malittarisassaani § 1 imm. 2-mi ima allassimasoqarpoq: ” Peqatigiiffiup siunertaraa kommunit ataatsimoorlutik nalinginnaasumillu soqutigisaat isumagissallugit, kommunit akunnerminni suleqatigiinnerat siuarsassallugu kiisalu kommunit ingerlatsineranni ikiussallugit”. Kommuneqarfik Sermersuumut tunngatillugu maleruagassaq taanna eqquutsinneqanngilaq!
Kommuneqarfik Sermersuup nakkutigisassanngortinneqarnerani sipaarniuteqartariaqalerneranilu, Naalakkersuisullu ataasiaannaratik KANUKOKA-mut isumaqatigiissut unioqqutillugu, tusarniaanerni piffissarititaasup sap. ak. arfineq pingasuniit ass. ullunut arfineq pingasuinnarnut appartitsinerannut KANUKOKA qisuariaateqanngilluinnartarpoq. Suliffissaaleqinerup akiorniarneqarnerani Kommuneqarfik Sermersooq suliffissaaleqiffiunerpaaq tunulliunneqarmat, KANUKOKA kingumut qisuarianngilluinnarpoq. Kommunilli sinnerini Siumut sinnerlugu borgmesterit, periussaasartut nalinginnaasut tamaasa avaqqullugit Sermersuup karsia 20 mio. koruuninik aallerfiginiarlugu toqqaannartumik Aningaasaqarnermut Naalakkersuisumik isumaqatiginninniarnermikkut KANUKOKA nammineersinnaajunnaarsimmassuk– KANUKOKAP siulittaasua kommunini pingasuni parteeqatimisut qitivippoq.

Kommuneqarfik Sermersuup KANUKOKA-mut ilaasortaaginnarnissaa annertuumik apeqqusertariaavoq.

Inussiarnersumik inuulluaqqusillunga

Malene Lynge
Kommuneqarfik Sermersuumi kommunalbestyrelsimi Inuit Ataqatigiit sinnerlugit

gruppimi siulittaasup tullia

mlyn@sermersooq.gl

Oqarasuaat: 58 39 0

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl