KANUKOKA-p siulittaasua toqqorterpoq

Kommuneqarfik Sermersuup siulersuisuini IA-p gruppiani siulittaasup Mille Søvndahl Pedersen-ip tusagassiuutinut nalunaarutaa 

KANUKOKA-p siulittaasuata Martha Abelsen-ip naligiissaarinissaq nutaaq pillugu isumaqatigiinniarnissamut suleqataarusunnginnera paasiuminaaqaaqaaq, taamaattoqarsinnaanngilarlu!

Martha Abelsen juunip 27-ani KANUKOKA-p siulersuisuinut allakkanik nassitsivoq.

Allakkamini kommunit sisamat akornanni isumaqatigiittoqannginnera, KANUKOKA-llu isumaqatigiissitsiniaqataaniannginnera, Martha Abelsen-ip nassuiaatigaa.

Martha Abelsen-ip allakkani ima naggaserpai: “naligiissaarinissamut nutaamut siunnersuut kommunalbestyrelsit ataasiakkaat akisussaaffiinik pingaarnernik kalluaammat, KANUKOKA siunnersuummut toqqaannartumik isummernissamut periarfissaqanngilaq.”

Kommuneqarfik Sermersuup kommunalbestyrelsiani IA-p gruppianiittugut uissuummeqaagut.

Kommunit ataatsimut soqutigisaannik isumaginninnissaq KANUKOKA-p suliassaraa. Kommunit iliuuseqarsinnaanerannut aningaasaqarneq aalajangiisuulluinnarpoq, naligiissaarinissarlu aningaasaqarnermut aalajangiisuulluni. KANUKOKA-p siulittaasuata kattuffik apeqqummut taama pingaaruteqartigisumut isummersinnaanngitsoriguniuk, suna suliassaralugu nassuiaattariaqarpaatigut.

Quarsaarpugut aperaagullu: Martha Abelsen Naalakkersuisunit naqisimaneqarpa, taamaammallu iluarineerunnissi siooragalugu oqaaseqarumanngila? Imal. Martha Abelsen isumminngila? Suna patsisaagaluarpalluunniit KANUKOKA-p sunniuteqaqataasinnaanngitsutut inissinneranik tamanna kinguneqarpoq.

Nunarput aningasaqarnikkut annertuumik unammilligassaqarpoq. Kommunit sisamat tamarmik- minnerunngitsumillu Kommuneqarfik Sermersooq – unammilligassat anigorniarnissaannut iliuusissanik pitsaasunik attanneqarsinnaasunillu nassaarniarnissamut piareersimarpasipput. Kommunilli Naalakkersuisunik isumaqatigiinniarnermi ataatsimoorsinnaanngikkunik, inuiaqatigiit pisariaqartitaat qitiutinneqarunnaassapput. KANUKOKA-p siulittaasuata taama pisoqarnerani tuini kiviinnarpai oqallinnermilu peqataajumanani. Taamaattoqarsinnaanngilaq!

Oqaaseqaateqartitserusuttut gruppimi siulittaasumut: Mille Søvndahl Pedersen-imut mobil: 48 21 03 saaffiginnissinnaapput.

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl