Tusagassiutinut Nalunaarut: Kalaallit Nunaata Arktisk Rådimi peqataanera

Kalaallit Nunaata Arktisk Rådimi peqataanera

Inuit Ataqatigiit iluarisimaarpaat Naalakkersuisut kiisami silattulersimammata Arktisk Råd-imi ilaajumajunnaarnertik pillugu. Kalaallit Nunaata Arktisk Rådimi peqataanissaa aatsaat taamak pingaaruteqartigilerpoq nunattalu tamakkiisu-mik Siunnersuisoqatigiinni peqataa-nissaa ullumikkut Naalakkersuisut isummernerattulli Inuit Ataqatigiit naalakkersuisuniik-kallarmata suliassani pingaarnerpaat ilagisimavaat.
IA-p oqaloqatigiinneq ersoqatigiinnerlu qinerpaa

Uagulli qaquguluunniit oqaloqatigiinneq ersoqatigiinnerlu atorsimassagaluarparput.

Peqataajumajunnaarnerup kingunerisimavai ataatsimiinnerit Kalaallit Nunaanni pisimasus-saagaluit nunanut allanut nuunneqartariaqarsimanerat ilisimatuullu kalaallit issittumi suleqa-tigiinni peqataanissaraluaminnik uninngatitsisimanerat.
Tamanna ilutigalugu mianersuaalliornerup aamma kingunerisimavaa Kalaallit Nunaat kisi-miissimammat naalagaaffiit namminersulersimasut Issittumiittut ataqatigiissaakkamik peqa-tiginagit, Naalakkersuisullu Siulittaasuata tusagassiuutinut nalunaarutaanik paasinninnerput naapertorlugu isumaqatigiinniarnerit inernerat Kalaallit Nunaata peqataajumajunnaarneq sioqqullugu inissisimaneraniit allaanerungaanngilaq.
Naalagaaffeqatigiinni taasineq ataasiinnaq suli atuuppoq

Kalaallit Nunaata Arktisk Rådimi peqataanini qallunaat savalimmiormiullu naalakkersuisui qanimut peqatigalugit ataqatigiissartuartussaavaa, Naalagaaffeqatigiinnilu taasineq ataasiin-naq suli atuuppoq. Siornatigutorluinnaq.

Taamatuttaaq erseqqissumik nalunaarutigineqarpoq Kalaallit Nunaata Arktisk Rådimi Naala-gaaffeqatigiit tamatigut sinnertarsinnaasassanngikkai. Naaperiarfigalugu isumaqatigiissummi qallunaat naalakkersuisuinik peqateqarluni pisimagunartumi Kalaallit Nunaata, Danmarkip Savalimmiullu issiavissat akunnerminni agguartassavaat suliassat suuneri naapertorlugit.
Sinniisuutitaqartarneq siornatigorniit qeratanerulersimavoq

Tungitsinniit piumanerusimassagaluarparput suliassamiit suliassamut kikkut piukkunnarne-runerat tunngavigalugu Naalagaaffeqatigiinnut sinniisuutitaqartarnissaq. Soorlu assersuuti-galugu nunanut allanut sillimaniarnermullu tun-ngasunik, qallunaat akisussaaffeqarfigisaan-nik, isumaqatigiinniartoqartillugu isumaqatigiissut massakkut imaakkunarpoq Danmark piu-masannguani atorlugu Kalaallit Nunaannik Savalimmiunillu sinniisassasoq Siunnersuisoqati-giinni naalagaaffiit tamarmik immikkut pingasunik inissaqartitsinngikkaangata. Taamaalilluni ullumikkut sinniisuutitaqartarneq siornatigorniit qeratanerulersimavoq.
Taamatuttaaq naleqqutinngitsutut isigaarput Kalaallit Nunaat Danmarkilu Arktisk Rådip siu-lersuisoqarfianik isumaqatiginninniarsimammata, suliassaq Kirunami ministerit ataatsimiin-nerani oqaluuserisassanut ilanngunnagu. Maannalu nalunarsivoq siunissami siulersuisunngo-rumaartussat apeqqut qanoq isummerfigiumaarneraat. Tassa imaappa siulersuisut nutaat atuunnerini tassunga assingusumik ajornartorsiuteqartoqalissappat peqataajumajunnaartuar-tassasugut?

Qularutigeqaarput Naalagaaffeqatigiit Canadallu akornanni isumaqatigiinniarsimanerup, ilami peqataajumajunnaarne-rulluunniit, issittumi naalagaaffiit sinniisuinut allanut sunniuteqangaar-simanissaat. Inissaminiissimassagaluarpoq suliassaq ammasumik oqaloqatigiinnerlu aqqutigalugu Kirunami ministerit ataatsimiinneranni saqqummiunneqarsimasuuppat, tamatu-muunalu Arktisk Råd tamakkiisoq peqataatillugu.
Issittumili innuttaasut allarpassuit aamma pineqarput

Naggataatigut isumaqarpugut Issittumi naalagaaffiit namminersulersimasut qanimut ataqati-giissaakkamik suleqatigi-simagaanni pitsaanerusimassagaluartoq. Naalagaaffiit namminer-sortut siunnersuisoqatigiinni inissisimanerat   Arktisk Rådimi pingaarnertut oqaluuserissallu-gu pisariaqarpoq. Kalaallit Nunaat kisimi pineqanngilaq, issittumili innuttaasut allarpassuit aamma pineqarput tamatumanilu Kalaallit Nunaat maligassiuisimasinnaagaluarpoq naligisat-sinnik ersoqatiginninnermik takutitsilluni. Tamatumami akerlianik Kalaallit Nunaat mannger-tippoq imminullu mattutiinnarluni annertunerusumik kinguneqanngitsumik.
Maannalu apeqqutaalerpoq allanngortinneqarsinnaanngitsumik aalajangiunneqarsimanersoq naalagaaffik taannalu kisimi qanorlu annertutigisumik naalagaaffeqatigiit sinnerlugit oqaa-seqartartuussanersoq, soorlu apeqqutit nunanut allanut sillimaniarnermullu tunngasut oqaluu-serineqartillugit?

 

 

Annertunerumik paasisaqarusukkuit attavigiuk:

Inuit Ataqatigiit siulittaasuat Kuupik Kleist,

oqarasuaat 32 37 02

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl