Aatsitassanut inatsip allanngortinneqarnissaanik suliaq 2021-imi ukiaagaa aallartippoq, Inuit ataqatigiit inatsisartuni siunnersuuteqarnitsigut. Ukiuni marlunngulersuni suliaq ingerlareersimalermat saqqummiussaq piaareersimaffigilluaratsigu piareersarluarfigilluarnikuugatsigulu upernaakkut ataatsimiinerup naammassinnginnerani inatsisissaq inatsisartuni naammassineqarsinnaasoq kissaatigaarput, partiit allat piffissamik sisivisunerusumik pisariaqartitsinerarput uagulli isumaqarpugut piffissamik sivisuumik periarfissaqareersugut.

Isumaqarpugut aatsitassanut inatsisisissap suliaralugu naammassinissaa nukinginnartuusoq. Siullertut ukiuni arlaqaqisuni innuttaasunit allanngortinneqarnissaa piumasaqaatigineqarsimavoq, aappaattullu aatsitassarsiorniarlutik ingerlatsiniartut qanoq imaqartumik aatsitassanut inatsimmik pilersitsilernerput paasipallassallugu pisariaqartimmassuk.

Inatsit pingasoqiusanngortinneqalerpoq:

Naalakkersuisut inatsisissamik qaqitsinerminni pingaartillugu siunnerfigaat aatsitassanut inatsisip pingasunut aggulunneqarnissaa. Inatsit maanna aatsitassarsiornernut assigiinngisitaartunut tamanut atuuttoq taarserlugu aatsitassarsiornerit assigiinngisitaartut immikkut inatsisiliuunneqarnissaat siunnerfigineqarpoq. Siunnerfiupput naliginnaasumik aatsitassarsiornissamut inatsit, annikitsumik aatsitassarsiorniartunut inatsit aamma ikummatsissanut inatsit.  Inatsisit innuttaasunut aammalu atuisunut ersarsarissarnerulertussatut, taamallu aamma nalorninannginnerulertussaaneri naatsorsuutigaarput.

S.I.K-p siulittaasuata maajip aallaqqaataanni oqalugiaatimini innuttaasut ilaasa peqqissusaat akigalugu peqqinnissaqarfimmut akissaqarnerulernissarput anguniarlugu aatsitassarsiornermik ingerlatsisariaqartugumik oqariartuuteqarnera akuersaanngilluinnarparput, kinaluunniit akigalugu aatsitassarsionermik ingerlatsisoqassanngilaq! Aap nunatta pisuussutai piumaneqartorujussuupput, mobiilit atortorissaarutillu allat piumaqaagut oqanngilagulli imaaliallaannaq nunatta karsianut aningaasarsiutigineqarlutik aallartittartut, aatsitassat qaqutigoortut piumaneqaqisut tusartuaraluarlugit piianissamik akuersissummik pigisaqartoqaraluartoq suli aatsitassarsiorluni aallartittoqanngilaq. Massakkut aatsitassarsiornissamut akuersisissummik pigisaqartut arfiniliupput, taamaattorli nunatta karsianut suli aningaasanik isaatitsineq malunnaateqanngilaq. Sulisartut siulittaasuata pineratut ikkunnaarluta sinnattuaqiunnaarluta piviusorsiortariaqarpugut, aatsitassanut inatsit allanngortinneqartariaqarpoq.

Innuttaasut piumasaat malinneqartariaqarpoq ilungersunarporlu sulisartut siulittaasoqarmata innuttaasut isumaannut tusarnaarsinnaasuseqanngitsumik, taamaalilluni innuttaasut isumaanik soqutigisaqanngitsumik.

Massakkut aatsitassanut inatsimmi innuttaasut peqqissusaata akornuserneqannginnissaa pingaartinneqarpallaanngilaq, tamannalu allanngortinneqartariaqarpoq aatsitassarsiorneq innuttaasut peqqissusaannik avatangiisillu akornuserneqarnerannik kinguneqassanngilaq. Uagut isumaqarpugut inatsimmi innuttaasut peqqissusaasa akornuserneqannginnissaat qulakkeerneqassasaoq, aatsitassarsiorneq aningaasatigut isertitsissutaanerusariaqartoq, tusarniaasarnerit akuutitsinerillu pitsaanerusumik ingerlasariaqartut kiisalu kissaatigaarput innuttaasut peqqissusaat pinngortitap avatangiisillu mingutinneqarpallaaratik aatsitassarsiornerit ingerlassasut.

Neriuutigaarput partiit inatsisissap suliarineqarnerani naaperiaasinnaajumaartut. Apeqqutaaginnarpoq partiit allat suliap sivisuumik ingerlareersimalersup qanoq piareersimaffigitigineraat.

Uagut sivisunerusumik utaqqititsinissaq orniginngilarput, nalornisitsinerup sivisunerunissaa kissaatiginnginnatsigu.

 

Mariane Pavisen,

Inuit Ataqatigiit, aatsitassanut oqaaseqartartoq