Inuit Ataqatigiit naalakkersuisooqatigiinni piumasavut aalajangersimasuusimapput

Inatsisartut siulittaasuata Naalakkersuisooqatigiit katitigaanerannik akisussaaffinnillu agguataarinnissimanerannik isornartorsiuinera Inuit Ataqatigiit pissusissamisuunngitsutut isigaarput. Naalakkersuisut suliassaqarfiillu agguataarneri Inatsisartunit taasissutaanikuupput Inatsisartullu siulittaasuannit tamanna ataqqineqarnerusariaqarpoq. Isornartorsiuineratali periarfissippaatigut sooq suliassaqarfiit aalajangersimasut akisussaaffigiumallutigit tigusimanerivut erseqqissumik nassuiassallugu.

Isumaginninnerup pingaartinneqarnerata qaffannera

Inatsisartut siulittaasuata tallimanngornermi 17. marts Nuuk TV-mi isumaginninnermut suliassaqarfik Inuit Ataqatigiinnit piumasaqaatigineqarsimannginnera oqarpoq. Erseqqissassavara eqqoriaaneq tamanna eqqunnginnerusinnaanngimmat. Inuit Ataqatigiit suliassaqarfik taannarpiaq pingaarnerpaatillutigu naalakkersuisooqatigiilernermi piumasarisimavarput nuna tamakkerlugu isumaginninnikkut pinartumik inissisimasoqarmat. Pingaartinneqarnera qaffakkumallutigu politikkikkullu erseqqinnerusumik sammivilerumallutigu isumaginninnermut suliassaqarfik tiguarput.

Inuit Ataqatigiit naalakkersuisooqataalernitsinni partiitut isumaginninnermut naalakkersioqarfimmut akisussaasuunissarput aalajangiupparput ukiuni aggersuni namminiilivinnissamut aqqummi, inuiaqatigiinni atukkatigut naligiinnerusumik atugaqalernissaq pingaartilluinnakkatta aamma ilagimmagu. Pingaartitarput tassaavoq inuttut atukkatigut qaffaanikkut naligiinnerusumillu atugaqalersitsilluta nunatta ineriartortinneranut namminiilivinnissaanullu nunaqqatigiit akornanni tamattaalluta kivitseqataasinnaanissarput.

Isumaginninnermut politikki erseqqissoq

Isumaginninnermut politikki assigiinngitsunik sammivilerlugu ingerlanneqarsinnaavoq. Inuit Ataqatigiit pingaartitavut aalajangersimasuupput: siusissukkut iliuuseqarneq, pinaveersaartitsineq, suliassaqarfiit akimorlugit suleriaaseqarneq, ingammik isumaginninnerup peqqinnissaqarfiullu akornanni, kiisalu inuit pisinnaatitaaffii tunngavigalugit sullissineq.

Inuit Ataqatigiit inuiaqatigiinni atukkatigut naligiinnerulernissamik siunertaqarpugut. Tamanna isumaginninnikkut pisortanit ikiorsiissutit aaqqissugaanerisigut suliassaavoq soorluttaaq sullisseriaatsit ilaqutariinnut tamarmiusunut isiginnittut siusissukkullu iliuuseqarnikkut tamanna anguneqarsinnaalluni.

Suleriaatsit taakkua ukiuni kingullerni amigaataasimapput. Taamaammat Inuit Ataqatigiit isumaginninnikkut sullisseriaaseq nutaajunerusoq ingerlakkumallutigu minnerunngitsumillu naalakkersuinerup iluani isumaginninnermik pingaartitsinerunissaq anguniarlutigu suliassaqarfik tiguarput.

Ataqatigiissumik akisussaaffilersuineq

Inuit Ataqatigiit suliassaqarfiit allat eqqarsaatigilluagaasumik aamma akisussaaffigissallutigit isumaqatiginninniarsimavugut. Peqqinnissamut isumaginninnermullu naalakkersuisoqarfiit qanimut suleqatigiinnerisigut siuissukkut iliuuseqarneq pinaveersaartitsinerlu suliassaapput. Akisussaaffiit taakkorpiaat tigunerisigut suliassaq tamanna aallartereerparput.

Assersuutitut siullertut naammassineqareersutut taaasinnaavarput oqarasuaatikkut siunnersuinerit isumaginninnerup peqqinnissaqarfiullu ataaniittut suleqatigiinnikkut maanna katinneqarnermata ammasarfiisalu sivitsorneqarnermata. Suliassaqarfiit akimorlugit tamanna suliaavoq suliassaqarfiillu akimorlugit suleriaaseqarneq ukiuni arlalinni uninngalluinnartutut issimasoq naalakkersuinikkut akisussaaffiit ukiarmi tiguavut.

Aningaasaqarnermut politikki saamerliusoq

Aningaasaqarnermut naalakkersuisoqarfimmi aaqqissuusseqqinnerit pingaaruteqavissut annertuumik sunniuteqarfigalugit ingerlanneqartussaapput. Aaqqissuusseqqinnerni aggersuni inuiaqatigiinni naligiinnerusumik atugaqalernissaq tunngavissatut pingaarutilittut Inuit Ataqatigiit naalakkersuisooqatigiinnissamut isumaqitigiissummut ikkunneqarnissaa piumasarisimavarput. Tamanna timitalerniarlutigu maanna sulivugut, ingammik aningaasaqarnermut naalakkersuisoqarfiup akisussaaffigineratigut.

Aningaasaqarmut naalakkersuisoqarfimmi aamma inuussutissarsiornikkut ingerlatsinermi akileraarnikkut akitsuutersuinikkullu sinaakkusiineq annertuumik ingerlanneqartarpoq. Inuit Ataqatigiit aningaasaqarnermut naalakkersuisoqarfiup qanoq qitiutigisumik inissisimanera ilisimalluinnaralutigu akisussaaffik tamanna tiguarput.

Aatsitassarsiornikkut periarfissiineruneq

Taamatuttaaq aatsitassarsiornikkut nunaqavissunik periarfissiinerunissamik suliniutinillu angissutsimikkut assigiinngisitaarnerusunik pilersitsisoqarnissaanik siunertaqarnerput naalakkersuisoqarfimmik akisussaanitsigut suliarilereerparput.

Aatsitassarsiornermut politikki erseqqissoq, nunatta avataanut nunatsinnullu sammivilik, siuttuuffigaarput pingaartipparpullu suliassaqarfik taama siunissatsinnut pingaaruteqartigisoq nalorninanngitsumik ingerlanneqarnissaa akisussaaffigigatsigu.

Suliassaqarfiit allat uatsinnut akisussaaffigitinneqarallarput. Taama ilinermi soorunami nakimanngivilluta akisussaaffik tiguarput, aamma suliassartaasa ilaat oqimaakkaluaqisut.

Eqqoriaaneq utertittariaqarpoq

Inuit Ataqatigiit naalakkersuisooqataalernitsinni siunertavut aalajangersimasuupput erseqqillutillu. Naalakkersuinikkut suliassaqarfiit Inuit Ataqatigiit akisussaaffigilikkavut eqqarsaatigilluagaasumik toqqagaapput. Naalakkersuisooqatigiinni partiitut angisuutut suliassaqarfiit tamaasa naalakkersuinikkullu ingerlatsineq annertuumik sunniuteqarfigaarput. Suleqatigiinnerlu nuannaarutigaarput.

Siumup iluani pissaaneqarniunneq akuleruffigissanngilarput Inuit Ataqatigiinnulli siulittaasutut erseqqissumik oqaatigissavara Inatsisartut siulittaasuata eqqoriaalluni piumasaqaateqanngitsumik suleriaaseqarsimanermik pasilliinera sakkortunerpaamik utertittariaqarakku.

Inatsisartut siulittaasuata tulluarissagaluarpaa nammineq partiimini tukattuliornerit nunatta inatsisartuisa siulittaasuattut inissisimanerminut akulerutinngikkaluarunigit. Kaammattuutigissavara Inatsisartut siulittaasuata naalakkersuinikkut akisussaaffinnik agguataarinnissimanermut Inatsisartullu taasinermikkut naalakkersuisunik suliassaqarfiillu inuttalersorneqarnerinik toqqaasimanerinut ataqqinninnerussasoq.

 

Sara Olsvig

Siulittaasoq, Inuit Ataqatigiit

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl