Inatsisartuni suleqatigiinneq pitsaanerulerli!

Nuuk, 5. juni 2014

Inatsisartuni suleqatigiinneq pitsaanerulerli!

Inatsisartuni upernaakkut ataatsimiinneq ullumikkut naammassivoq. Inuit Ataqatigiit Inatsisartuni ilaasortaatitaat isumaqarput Inatsisartuni sulineq pimoorunneqarnerusariaqartoq.

Maluginiakkatta ilaat tassaavoq Naalakkersuisunit suliassaqarfinni annerni  naaperiaarusussuseqartoqanngittoq, oqallinnerillu sukkut tamaana unitsinneqarlutik mattuneqaannartarneri tamat oqartussaaqataanerannik aallaaveqartumik aqutseriaatsimut tulluanngilluinnartoq isumaqarpugut.

Ataatsimiititaliani sulineq pitsanngortariaqarpoq

Ataatsimiititaliani sulinerup apparnera ammasumik eqqartorlugu pitsanngortittariaqarparput – sulisariaqarpugummi! Sulianut ilumoorussinngippallaarneq takusartagarput, inuit piareersarsimanatik takkuttarnerat Inatsisartut sulinerannut apparsaataaqaaq.

Taamaattoq ataatsimiinnermut angusaqarfiulluartumut qujalluta, kaammattuutigaarput ukiakkut ataatsimiinnissatsinnut suleqatigiinneq annertunerusoq Naalakkersuisut partiillu tamarmik timitalersussagaat.

Naapinnerit nuannaarutigaavut

Angusat politikkikkullu isumaqatigiissutit upernaaq manna naammassisavut arlaqarput.

Naak misileraalluni avaleraasartoorniarnermi akitsuutit suliarineqarneri aallaqqaammulli Naalakkersuisunit suliarinerlutaasimasut, aningaasaqarnermut ataatsimiititaliami partiit suleqatigiilluarnerisigut isumaqatigiissusiortoqarmat nuannaarutigaarput. Aalisarnermi kiilu-mut akitsuut siunnersuutigineqartumik apparlugu 95 øre-nissaanik isumaqatigiissutigineqarmat nuannaarutigaarput. Inuussutissarsiornikkut ineriartortitsineq sattalluni aalajangikkallu kingunissaannik ilisimasaqarani ingerlanneqannginnissaa kaammattuutigissavarput.

Nunalerinermi imminullu pilersornerup annertusarnissaanut aningaasaliissutit 15 mio. kr.-inik annertusaaviginissaat anguarput.

Suliffissaaleqineq akiussallugu tamatta akisussaaffigaarput

Suliffissaaleqinermut akiuiniarneq pimoorussisumik ingerlanneqartariaqartoq partiit tamaasa suleqatiserisimagaluarpagut; anguniarlugu ilinniartitaanikkut annertusaaneq aqqutigalugu suliffissaaleqineq akiorniarneqassammat, tamannami sanaartugassanik siuartitsinerinnakkut pisinnaanngilaq, minnerunngitsumik suliassaqarfimmi tassani kommunit suleqatigineqartariaqarneri oqariartuutigaarput.

Tarnimikkut nappaatillit atugarisaat pitsanngorsarumallugit siunnersuutit marluk akuerineqarmata, nunatsinni tarnimikkut nappaatillit 900 missaaniittut sullinneqarnerisa pitsaa-nerulernissaat anguniarparput, tamatumanilu qanigisaasut peqataatinneqarlutik sullissinermut ilaanissaat angusariaqarparput.

Aalisarneq pillugu naapissinnaasariaqarpugut

Pissanngatigisarput tassaavortaaq aalisarnermut inatsit nutaaq ukiamut saqqum-miunneqartussaq, maannamummi nunatsinni inuussutissarsiutit aningaasarsiornikkut avammullu nioqquteqarnikkut annersaat pillugu Naalakkersuisut qanoq sinaakkusersuiniarnersut tusarsimanngilarput.

Pingaaruteqartorlu tassaavoq inatsisissaq saqqummiunneqarpat tamakkerluta naaperiuteqarnitsigut, aalisarnermi sinaakkutissat ukiorpassuarni atuuttussat qulakkiissagigut, taakkulu politikkikkut ”anorip nikinnerinut” sunnertiavallaanngitsumik inissinneqassasut. Maannamut suliassaqarfik taanna politikkikkut aporaaffiuallaaqaaq, tamannalu inuussutissarsiummut ingerlataqartunut toqqissisimananngilaq.

Nunatta patajaatsumik ineriartortinnissaanut akisussaaqataarusuppugut

Nunatta aningaasaqarnikkut patajaattumik inissinnissaa Naalakkersuisunit qanoq iliuuseqarfiginissaa suli tusagaqarfiginngilarput. Suli paasinngilarput Naalakkersuisut qanoq politikkeqarnersut – aaqqissuusseqqinnerit qanoq ittut naatsorsuutigisariaqarnerigut.

Nunatta politikkikkut patajaatsumik aalaakkaasumillu ingerlanneqarnissaa suleqataaffigerusoqaarput. Tamanna angujumallugu oqaloqataanissamut suleqataanissamullu Inuit Ataqatigiinnit piareersimalluinnarpugut. Ajoraluartumik suliassaqarfinni amerlavallaani oqaloqatigiinnerit suli pinngillat. Neriuutigaarput Naalakkersuisut aningaasaqarnermut inatsisissamik, aalisarnermut inatsisissamik suliassanillu allanik suliaqarnerminni illuatungiliuttunik sioqqutsilluartumik oqaloqatiginninnissanut qaaqqusisalerumaartut.

Inuit Ataqatigiit sinnerlugit

Sara Olsvig

Siulittaasoq

Mobil: 526858

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl