Hans Pavia Egede – inuk immikkuullarissoq maqaasineqassaaq

Hans Pavia Egede

Partiip allattaanerisimasaata politikeriusimasullu Hans Pavia Egedep toqukkut qimagussimaneranik Inuit Ataqatigiinni aliasuutigeqisatsinnik tusarlerneqarpugut. Hans Pavia Egede politikkikkut qinikkatut sulinermini Atassut Akulliit Partiiallu tunuliaqutarereerlugit ukiuni kingullerni parteerput tunuliaqutaralugu sulivoq. Qinikkatut kingullertut Kommuneqarfik Sermersuumut ikaarsaariarnermut ataatsimiititaliaanut ilaasortatut atuuppoq sulinerminilu nunatsinni illoqarfiit pingaarnersaannut inunngorfimminut Nuummut asanninnera ersialaartuarpoq. Illoqarfissuup nunattalumi sinnerata ineriartortittuarnissaanik piumassuseqarnermigut Hans Pavia maligassiuiuarpoq. 2008-mi Hans Pavia Egede Inuit Ataqatigiit allattoqarfiani atorfinippoq ukiunilu 2011-mit 2013-mut Inuit Ataqatigiit Kattuffiannut allattaaneruvoq.

Hans Pavia Egede Inuit Ataqatigiinnit politikeritut partiimullu allattaanertut qarasarissutut anersaakkullu silassorissutut eqqaamajuassavarput. Oqallorissuuvoq allattariarsullammaallunilu toqussilu qanillinissaata tungaanut torrallatanik nutserissussillattaasarpoq. Aalisarnermut politikkimut inuiaqatigiinnilu aningaasarsiornermut allanullu ilisimasaqarluarluni suleqatitut angusaqarusuttutut naleqartinneqarluartutullu ilisimaneqarpoq. Politikkikkut allatigullu suleqatigisimasaasa amerlasuut silassorissusaanik misigisaqartarsimapput amerlasuullu Hans Paviap naatsunik, paasinartunik eqquilluartunillu pineqartunut eqqarsaatigilluagaasimasunut oqaaseqarsinnaasarnera eqqaamassassavaat.

Hans Pavia Egede politikkikkut allatigullu qanigisaminik ilisarisimalersimasaminik ikinnguteqarluarpoq. Hans Pavia maqaasineqassaaq, minnerunngitsumik qanigisaminut isumassuiuarnera tukkortuujuneralu maqaasineqassaaq.

Inuit Ataqatigiit Hans Pavia Egedep ilaqutaanut ikinngutaanullu misiginneqatiginninnerput apuupparput.

Hans Pavia Egedep eqqaaneqarnera ataqqinartuuli.

Sara Olsvig
Siulittaasoq
Inuit Ataqatigiit

Inuit Ataqatigiit Kattuffiat

Imaneq 2, Postboks 321, 3900 Nuuk
Tel: (+299) 346 272
Fax: (+299) 321 321
Website: http://www.ia.gl
Email: ia@ia.gl