Folketingimut – Tunngaviusumiguna inatsisiliorneq pineqartoq

Qujanaq piffissami kingullermi nunatta Tunngaviusumik inatsisiliorniarnerani oqallinnermut soqutiginninnissinnik. Naqqiutigilaarlarali suleqatigiissitaq pilersitaq ateqanngimmat: Namminiilivinniarnermut isumalioqatigiissitaq. Ateqarporli: Tunngaviusumik Inatsisiliornermut Isumalioqatigiissitaq. 

Tunngaviusumik Inatsisiliornermut isumalioqatigiissitaq ersarissumik suliassinneqarpoq, tassalu Tunngaviusumik inatsisissamik siunnersuuteqarluni suliaqarnissaminut.  Taannalu aatsaat atulissaaq inuiaat kalaallit taasinermikkut akuersippata tunngaviusumik inatsit akueralugu .Suliaq aatsaat aallartilaarpoq. Suliaq kalaallit nammineq aallartipparput, danskit nunasiaateqarsimasut isumassarsisimanngimmata tamatumunnga aqqutissiuutissalluta. Uanga isumaga malillugu nuna nunasiaateqarsimasoq tassaasuussagaluarmat nunasiaatigisimasami naalagaaffinngornissaanut ikorfartuillunilu kaammattuillunilu suliamik aallartitsitisoq. Taammaanngilarli, uagut nammineq aallartippugut. 

Tunngaviusumik inatsisiliorniarnitsinni soorlu danskit politikeriisa tapersersornerulluta, naligisutut illuta suleqatigiumassagaluaraatigut. Kisianni nipi imaattoq apuuttarpaat: meeqqat sullinniarsigit, isumaginninneq aningaasarsiorneq suliarinngilasi, tamanna suliariniarsiuk. 

Kalaallit Nunaanni ilungersoqaagut meeqqat, atugaat pitsanngorsarniarlugit. Meeqqat illersuisuanik 2012-mili pilersitsivugut. Danmarkimi meeqqat ulloq manna tikillugu illersuisoqanngillat. 

Meeqqat pitsaanerpaamik sullikkumallugit meeqqanut inatsisilioqqammerpugut. Innarluutilinnut illersuisortaarnikuuvugut. 

Nunatsinni imigassamik atornerluineq millisipparput, sulilu millisarlugu. Maannalu inuusuttortatta imernerat millisarniarlugu ikiaroornartumullu akiuiniarluta suliaqarpugut. 

Isumaginninnerlu pingaartitsilluinnarparput, Inuit Ataqatigiillu Naalakkersuisooqataalernitsinniit Isumaginninnikkut suliassat siuttuuffigilerlutigit. Isumaginninnikkullu sulianut annertunerujussuarmik aningaasaliilluta. Taakkulu eqqaasatta avataani aamma allarpassuarnik sulianik aallartitsilluta. 

Taamaammat danskit politikeriinut oqaatigiumavara ilungersorluta inuit, meeqqat atugaat pitsanngorsarniarlugit suliuaratta. Taassumalu saniatigut tunngaviusumik inatsimmik sanalluta. 

Danskit politikerii oqallinnermut tikilluaqquakka. Oqallinnerli naligiippasissumik aallaaveqarli. Oqaalullutalu, sunillu suliaqassanersugut uparuartorutsigut nunasiaateqarsimanermi misigisat utersaartarput. 

Naligiilluta,oqaluttuarisaanerput akueralugu, siunissaq pillugu suleqatigiitta. 

 

Mimi Karlsen

Tunngaviusumik inatsisiliornermi isumalioqatigiissitami ilaasortaq

Inuit Ataqatigiit

Inuit Ataqatigiit Kattuffiat

Imaneq 2, Postboks 321, 3900 Nuuk
Tel: (+299) 346 272
Fax: (+299) 321 321
Website: http://www.ia.gl
Email: ia@ia.gl