Aningaasanut inatsisissaq ernumaammernarpoq

19. august 2014

 

Aningaasanut inatsisissaq ernumaammernarpoq

Inuit Ataqatigiinni isumaqarpugut qanillattoqatigiinnissaq naaperiaanissamullu piumassu-seqarnissaq aatsaat taamak pingaaruteqartigisoq.

Ukiuni arlalinngittortuni ”siunissaq” aningaasarsiornikkut unammilligassanik annertuunik nassataqarumaartoq eqqartortarparput. Siunissaq tassa takkutereerpoq, Nunarpullu aningaasarsiornikkut ilungersunartorsiorfiuvoq. Taamaammat suleqatigiinnissamut aaqqissutissanillu ataatsimoorussilluni nassaarniarnissamut piffissanngorpoq.
Nunatsinni aningaasarsiornikkut ilungersunartorsiornerup nalaani Naalakkersuisut 2015-imut Aningaasanut Inatsisissatut siunnersuutaat atuarlugu nikalluallannartuuvoq. Inuit Ataqatigiinni nunatsinni aningaasarsiornikkut pissutsit aarlerilersitsisariaqartutut isigaagut, Inatsisissatullu siunnersuummi periusissanik aaqqiissutaasinaasunik imaluunniit ajornartorsiornermik annikillisitsisussanik takusassaaleqivugut. Suleqatigiinnissamut isumaqatigiinniarnissamullu piareersimavugut. Naalakkersuisut kajumissaarusuppavut sapinngisamik amerlanerpaat peqataaffigisinnaasaannik Aningaasanut Inatsisissaq pillugu isumaqatigiinniaqqullugit, ataasimoorluta ajornatorsiutigisatsinnut aaqqiissutissanik attanneqarsinnaasunik nassaarsioqatigiinniassagatta.

 

Aningaasanut Inatsisissamut Siunnersuummi ajornartorsiorneq arlalitsigut ersippoq:

• Suliassanut annertuunut aningaasalissutit ikilisinneqarniarput (ALCOA-p pilersaarutaa). Suliap qanittukkut piviusunngortinneqarsinnaanera qularutigineqarunarluni.

• Naalakkersuisut allapput ukiuni aggersuni kiffartuussinikkut pitsanngoriaatissat akissaqartinneqassanngitsut aningaasat suminngaanniit aaneqassanersut ilisimanngikkaanni.

• Suut tamarmik pissusissamittut ingerlassappata taava nunatsinni aningaasarsiorneq qaffariaateqassanngilaq, aningaasarsiornerlu unittooriartortut pissuseqassalluni.

• Suliffissaaleqineq annertoorujussuuvoq.

• Nationalbankimiit isertitassavut naatsorsuutigineqaraluartuniit ikinnerussapput, taamatullu aamma pisortat ingerlatsinerisa allanngortiterneqarneraniit kiisalu ingerlatseqatigiiffinniit akileraarutit ikinnerussallutik.

• Eqqussukkat akitsuusersorneqarneranniit, motorinut qaleralinnullu akitsuutiniit isertitat ikiliartorput, tamannalu unittooriartornermut takussutissaalluni.

• Naalakkersuisut nalunaarutigaat EU-mik aalisarnikkut nutaamik isumaqatigiissuteqarput aningaasanik ikinnerusunik isertitsiffiussasoq.

 

Piviusorsiunngitsumik missigersuusiorneq innuttaasunut akiligassanngortinneqassaaq

Naak Naalakkersuisut ajornartorsiutinik takunnissinnaagaluarlutik iliuuseqarnissaminnut tunuarsimaartut malunnarpoq. Naalakkersuisuniit aaqqiissutissatut tikkuunneqartut arlal-lit Inuit Ataqatigiinnit piviusorsiunngitsutut aammalu Naalakkersuinikkut naammattumik sapiissuseqanngitsutut nalilerpagut.

Ingerlatseqatigiiffiutiniit aningaasanik suli amerlanerusunik aallerniarneq siuinissamut qaninnerusuinnarmut eqqarsarneruvoq. Paasisariaqarparput ingerlatseqatigiiffiit aamma unammilligassaqarmata, pingaartumik Royal Arctic Line eqqarsaatigalugu. Akiligassat innuttaasunut inuussutissarsiortunullu ingerlateqqinneqarsinnaanerat aarleqqutigisariaqarpoq.
Pisortat pisiniartarnerat suli sipaarfioqqissasoq Naalakkersuisut pilersaarutigaat. Inuit Ataqatigiinni tamanna iluaqutaassanersoq suli qularaarput. Soorunami pisiniarnermi sipaaruteqarsinnaaneq periarfissaajuassaaq. Mianerisassarli tassaavoq pisiassat tamarmik nunatta avataaniit pisiarineqartalerataannaanerat. Tamanna suliffinnik ilinniarfissanillu naleqassaaq, aningaasarsiornikkullu ajornartorsiutitsinnik annertusaassalluni.
Ingerlatseqatigiiffinnut tapiissutit 0-nissaat piviusorsiunngilaq, assersuutigalugu Great Greenlandip qanoq ingerlanera qiviaraanni. Aamma kiffartuusinermut aningaasaliissutit annerusumik aningaasartorfiunnginnissaannik siunnerfeqarneq piviusorsiorpasinngilaq. Paasisariaqarparput assartuinermut akit aammalu ikummatissanut akit qaffannerisigut suliffeqarfinnik ingerlatsineq aamma akitsussammat. Akiligassallu tamakku atuisunut ingerlateqqiinnartariaqanngillat.

 

Iliuuseqarnissamut piffissaavoq

Inuit Ataqatigiinni Naalakkersuisut aalajangertigatik suli nassuiaasioqqinnissanik qulaajaanissanillu arlalinnik ilimasaarinerat naammaginngilarput. Sorpassuartigut ilisimasariaqartut pigereerpagut. Taamaammat massakkut iliuuseqarnissamut tunngavissaqarpugut. Kisianni Naalakkersuisut aaqqissuusseqqinissaq pillugu aammalu ineqarnermut tunngasumik nutaanik nalunaarusiornissat ilimasaarutigaat. Tamatuma saniatigut Aningaasaqarnermut Naalakkersuisup suli ”Attanneqarsinnaasumik inuiaqatigiinnni aningaasaqarniarneq” pillugu pilersaarusiani nammassisimanngilaa. Ilimanarpoq pisarialinnik iliuuseqarnissamut aporfiusoq naalakkeruisooqatigiinniittoq. Inuit Ataqatigiit naalakkersuisooqatigiit ilungersortumik kajumissaarpaat anguniakkatik angujumasatillu erseqqissaqqullugit, inuiaqatigiinnilu attanneqarsinnaasumik aningaasaqarniarneq iliuuseqarfigeqqullugu.

Inuit Ataqatigiit aningaasanut inatsimmi amigartooruteqartoqarsinnaanera tapersersorsinnaavaat, aningaasat eqqarsaatigilluakkamik isumatuumillu atorneqassappata. Siunissatsinni iluaqutaasinnaasunik naaperiarfiusinnaasut arlaqartut takusinnaavagut. Inuusuttut suliffissaqanngitsut pillugit suleqatigiittariaqarpugut, inuussutissarsiornerni tamani atugassarititaasut pillugit aammalu atugarissaarneq pillugu ataatsimoorfissat, pisortat kiffartuussineranni qitiusut soorlu peqqinnissakkut, angallannikkut ilinniartitaanikkullu ataatsimoorussaqartariaqarpugut. 2015-imi Aningaasanut Inatsisissaq pillugu piviusumik isumaqatigiinniarnissarput qilanaaraarput.

 

Attavissaq: Naaja Nathanielsen, 54 89 81

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl