Akullernit nalunaarut

Ulluni juulip 5-ni 6-nanilu Inuit Ataqatigiit Qeqertarsuup tunuaneersut Akullerni isumasioqatigiinnertalimmik naapisimaarput. Sammineqartut tassaapput Qaasuitsup kommuneani, Inatsisartuni Naalagaaffeqatigiittullu politikkikkut killiffiit.

Isumasioqatigiinnermit pingaarnertut nalunaarutissat tassaapput:

Uranimut naaggaarneq Inuit Ataqatigiit attappaat isummatsinnik allannguinissamut tunngavissanik maannamut saqqummersoqanngimmat.
Naalakkersuisut Inatsisartuni 2013-mi ukiami ataatsimiinnermi urani aatsitassallu allat ulorianartunik qinngornertallit pillugit akuersaanngilluinnarneq atorunnaarsinniarlugu nalunaarput.  Urani pillugu tamat oqartussaaqataanerat innarlerneqarujussuassasoq isumaqarpugut paasissutissiinerit innuttaasunillu aalajangiiniarnermi peqataatitsinerit amigartut  tunngavigalugit aamma  kingunerisassanut naammattunik ilisimasaqanngitsunik amerlanerussuteqarnikkut uranimut aatsitassanullu allanut ulorianartunik qinngornertalinnik akuersaanngilluinnarneq Inatsisartuni peerneqassappat.
Inatsisartunut qinersinermi amerlanerussuteqalernerup Uranimut akuersaanngilluinnarnerup allanngortinneqarnissaanik kissaateqarnertut tunngavilersuiniarneq tamat oqartussaaqataanerannik innarliinertuttaaq Akullerni ataatsimiittut isumaqarput.

Kujataaniik naatitanik uumasuutinillu pilersorneqarnerput piaartumik piorsarusupparput. Nunatsinni imminut pilersornerulernissaq  angujumallugu. Siunniunneqarpoq imminut pilersornerup pilertornerusumik inerisarnissa siunertarlugu avataaniit nerisassat eqqussukkat CO2 akitsuusersorneratigut  sinerissami  nerisassaatitta  assartorneranut aningaasartuutit apparneqassasut,  malitsigisaanillu pisiniarfinnilu akigitinneqartoq appasinnerulersinnissaa anguniarneqassasoq.

Qaasuitsup kommuneani isumaginninnikkut innuttaasunillu sullissinikkut kingaatsuararsuarmik sullissilersimaneq qimallugu eqaatsumik pilertortumillu sullissineq angusariaqartoq, utaqqisitsineq innuttaasunik kommuniillu akisunarneqartarmat.

Namminersornerup tungaanut ingerlanermi kalaallit 75 %-tiisa 2008-mi taasinikkut aalajangersimasaat  ataqqillugu  Namminersulivinnissap tungaanut ingerlaneq Inuit Ataqatigiit Akullerni katerisimartut eqqaasissutigerusuppaat. Taamalillutillu maanna Naalakkersuisut siulittaasuusup inuiat sinnerlugit  tuluttut apersorneqarnermini eqqungittumik tungavilersugaangittumillu  paasissutissiinera  ilungersunartutut isigalugu. Namminersorneq pillugu inatsisip imarivaa Namminiilivinnissap aningaasarsiornikkut aqqutissiuunneqarnissaa. Inuit Ataqatigiit sulissutigaat Nunarput Namminersorluni ingerlasoq atugarissaarnermik tunngaveqartoq, Inuit Ataqatigiit sulissutiginiarpaat Nunarput Namminiivittoq atugarissaarnermik tunngaveqartoq. Taamaammat namminiilivikkiartuaarnermi  aningaasaqarnikkut isumannaallisaanissaq pingaartipparput.

Akullerni Inuit Ataqatigiit naapinneranni Kangaatsiami, Aasianni, Akunnaami Qasigiannguanilu Inuit Ataqatigiit immikkoortortaqarfii peqataapput Qaasuitsup kommuneani kommunalbestyrelsemut, Inatsisartunut, Folketingimut, Nunaqarfinnilu Aqutsisunut qinikkat aamma peqataallutik.
Aasakkut naapeqatigiiinneq tulleq pissaaq Akunnaami julip naalernerani 2014.

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl