Aalisarnermut Naalakkersuisoq eqqortumik nassuiaasariaqarpoq!

Aalisarnermut Naalakkersuisup aningaasaliissutissatut aalisarnermut immikkoortitat pillugit radiokkut oqaaseqarnermini KNAPK paasinerluisimanerarlugu oqarnera eqqunngilaq. Tamanit takuneqarsinnaavoq Naalakkersuisut aningaasanut initsisissatut siunnersuutaanni, angallatinik isaterinissamut aningaasat 20 mio. kr.-nik amerlassuseqartut nungutinneqarnissaat siunnersuutigineqartoq.  KNAPK-p eqqortumik tikkuaanera tassuuna uppernarsarneqarsinnaavoq.

Aningaasaliissutit angallatinik isaterinissamut aningaasaliissutaannaanngillat
Aningaasaliissutit nungutinneqarniarnerinut Aalisarnermut Naalakkersuisup tunngavilersuutigaa, angallatinik isaterinissamut aningaasaliissutit atorneqartannginnerat, kisianni Naalakkersuisup minnerpaamilluunniit eqqanngilaa aningaasat pineqartut angallatinik isaterinissaannarmut aningaasaliissutaannginnerat.

Aamma aalisariutinik nutarterinermut, misileraalluni aalisarnermut, ineriartortitsinermut il.il.
20 mio. kr.-it siunertanik makkunannga siunnerfilinnut atugassatut aningaasaliissutaapput: Aalisariutinik nutarterineq, misileraalluni aalisarneq, aalisartut iluaqutigisinnaasaannik ineriartortitsineq, aalisariutinik naleqqussaaneq kiisalu angallatinik isaterinissaq.

Tunngavilersuutigalugu aningaasaliissutinik atorunnaarsitsiniarneq
Taamaammat angallatinik isaterinermut aningaasaliissutaasartut atorneqartannginnerat kisiat tunngavilersuutigalugu aningaasaliissutinik atorunnaarsitsiniarneq pissusissamisuunngilaq. Pingaartumillu eqqarsaatigigaanni Naalakkersuisup inatsisip aporfiusartup Inatsisartut ukiaanerani ataatsimiinneranni allanngortinneqarnissaa pissasoq oqaatigereernikuugaa, qularutigineqarsinnaanngilaq aningaasaliissutit pisariaqartinneqarlualissasut.

65 mio. kr-it aalisartut akitsuiffiginerisigut isertinneqarniarput
Aalisarnermut Naalakkersuisup susassaqarfimminut akisussaasutut pitsaanerusumik paatsuungananngitsumillu nassuiaasarnissani aqutsinissanilu ajornartorsiutigaa. Assersuutigalugumi Qanoruukkut kikkut tamarmik takusaannik tusaasaannillu oqaatigaa, aningaasanut inatsisissaq aalisartut akitsuutinik nutaanik nammatassinneqarnissaannik imaqanngitsoq, naak aningaasanut inatsisissatut siunnersuummi 65 mio. kr-it ukiut marluk ingerlaneranni aalisartut akitsuiffiginerisigut isertinneqassasut Naalakkersuisut nalunaaruteqaraluartut.

Naalakkersuisut akisussaasutut eqqortumik nassuiartussaavaat
Naalakkersuisut akisussaasutut susassaqarfitik eqqortumik nassuiartussaavaat, qanorlu pisoqarniarnera ilisimalluarlugu inuiaqatigiinnik paatsuungatitsinatik saqqummertariaqarlutik.
Ukiut marluk ingerlaneranni aalisartut akitsuiffiginerisigut isertitaqarnissamik Naalakkersuisut tamarmiullutik siunnersuutaattut saqqummiunneqartoq, Aalisarnermut Naalakkersuisup akuerinngisaannassallugu oqaaseqarpoq. Akitsuutilli taakkua ukiuni tulliuttuni aalisartut atugarisaannut sunniuteqangaartussat, aamma nammineq naalakkersuisutut siunnersuutigai akisussaaqataaffigalugillu, namminerluunniit naalakkersuisunngunngikkallarami aalajangerneqarsimassagaluarpata. Saqqummiussat akisussaaffigiumanagit nalunaaruteqarsinnaanngilaq, sioqqulluni naalakkersuisuusimasoq naalakkersuisullu sinneri taama suliaqarsimasutut pisuutillugit.

Inuit Ataqatigiit piumasarivaat tukattumik saqqummiusseqattaarnerat uneqqullugu
Inuit Ataqatigiinniit sakkortuumik piumasarissavarput naalakkersuisooqatigiit iluminni akerleriinnerat, aporaannerat tukattumillu saqqummiusseqattaarnerat uneqqullugit, sulinivillu ataatsimoortitsiniarnerusoq aallarteqqullugu. Naggataatigut toqqartumik apeqqutigissavara: Ilumut KNAPK paatsoorsimava?

Aalisarnermut Naalakkersuisup neriorsuutini qimarratigisimavai?
Imaluunniit Aalisarnermut Naalakkersuisup neriorsuutini qimarratigisimavai? Apeqqut akineqartariaqarpoq. Tassami ilumoorsinnaanngilaq angallatinik isaterinissamut aningaasaliissutit kisiisa tunngavilersuutigalugit siunertanut allarpassuarnut aningaasaliissutit atorunnaarsinneqarnissaat. Neriullunga eqqortumik paasinartumillu Aalisarnermut Naalakkersuisoq nassuiaateqassasoq.

Attavissaq: Inatsisartunut ilaasortaq Aqqaluaq B. Egede, Inuit Ataqatigiit, mobil 56 27 66

Inuit Ataqatigiit Kattuffiat

Imaneq 2
Postbox 321
3900 Nuuk
Kalaallit Nunaat
Phone: (+299) 329888
Website: http://www.ia.gl
Email: ia@ia.gl