1.maj sulisartut ulluanni Inuit Ataqatigiit oqaaseqaataat

Tusagassiutigut nalunaarut

1. Maj 2014

 1.maj sulisartut ulluanni Inuit Ataqatigiit oqaaseqaataat 

Kalaallit Nunaat inuiaallu kalaallit naalakkersuinikkut ingerlatsinitsinni ine-riartornitsinnilu aatsaat taamak sulinermik inuussutissarsiuteqartunik pisa-riaqartitsinerput annertutigilissaaq. Ukiuni tulliuttuni aningaasarsiornikkut siuarsarnissarput piumasaqaataavoq. Piumasaraarput inuussutissarsiutit nutaat aamma aatsitassarsiorneq siuarsarneqassasut. Siuarsaanissamillu timitalersuineq naalakkersuinermik suliaqartugut tamatta inuiaqatigiit nunaminni suliffissaqartinneqarnissaat siullertut pingaartissavarput.

Piffissanngorpoq inuiaat namminersortut aqqummik ataatsimut inger-laarfigisinnaasatsinnik nassaarniarnissarput. Naalakkersuinikkut isummat avissaartuunnerat inittoraluttuinnarpoq. Siunnerfiit ataatsimoorfiusut ersialaartinneqanngippallaarput. Naak immaqa apeqqusersinnaanngikkaluaripput siunnerfik toraagarput isumaqatigiiffiusoq. Qanorli siunnerfiup anguneqarnissaa, aqqutissatsinnilu qanoq ilusiliisoqarnissaa kisiat eqqartorparput. Taakkuuppullu nunatsinni inuit aammalu partiit tamarmik pikkoriffiginerusariaqagaai ataatsimoorfinngortissallugit.

Inuit Ataqatigiit sinnerlugit sulisartut ulluanni pingaarutilittut suliassarput tikkuarusuppara. Tassalu suliffissaaleqisut akuersaarneqarsinnaanngitsumik amerliartuinnarnerat immikkut iliuuseqarnissatsinnik pisussaaffiliivoq. Suliffissaaleqisut amerlassusaatigut takuarput inuiaqatigiinni nukerujussuaq pigisarput sulinermut atunngikkipput. Tamanna akuerinagu suliffissat imminullu pilersornikkut oqaaseq suliffissaaleqineq ipisikkiartussavarput.

Taassuma saniatigut inuit sulinermik inuussutissarsiuteqartut amerlanerpaartaasa aningaasarsiaasa akinut qaffakkiartortunut katataajartorput. Nunatsinni inuit assigiinngitsunik atugassaqartitaanerat suli assigiinnginneruleriartorpoq. Angajoqqaat arlalinnik meerallit aamma angajoqqaat kisimiittut akinut qaffakkiartortunut malinnaasinnaanerat inornarsereerpoq.

Pissutsit tamakkua aaqqinneqassappata akileraartarnikkut aaqqissuusseqqinnissaq kinguarsarneqarsinnaanngilaq. Suliassaavoq inuit sulinermik inuussutissarsiuteqartut atugaasa nutarternerisigut inuup sulinerata akilersinnaasunngorsarnissaanut ammaasisussaq. Tamakkuli suliarineqassappata partiit assortuunnerat inituallaarunnaarsillugu oqaloqatigiinneq, suleqatigiinneq, isummersoqatigiinneq ataatsimoorissinerlu annertusartariaqarparput. Inuiaqatigiinni angusassaq pitsaanerpaaq paaseqatigiilluni ingerlaaqatigiinnikkut aatsaat anguneqarsinnaavoq.

Ajornartorsiutilli piugaluartut, suliffissaaleqinerlu qaffasikkaluartoq immikkuik sulisitsisut sulisartullu tamassi Inuit Ataqatigiit sinnerlugit qutsavigerusuppassi. Ullumikkut ajornartorsiutit suli ilungersunarnerujussuussagaluarput ilissi sulinissigut nunatta ajornerusumik inissinnissaagalua pinngitsoortipparsi. Sulinermik inuussutissarsiuteqarneq, inuiattut nukitta pingaarnerit ilagaat. Pingaartitsinerulli attanniarnissaa ilissi sulinissigut ersersittarassiuk inuianni napatitseqataalluarnersi qamuuna tulluusimaarutigisarsiuk

Sulisartut ulluanni sineriassuatsinni sulisartut aammalu suliffeqarfitsigut aningaasarsiornikkut atugassarititaasut periarfissaasullu nutaamik nali-lersuiffigineqarnissaat Inuit Ataqatigiit pingaartippaat. Ullumikkut innaallagissamut akit atuuttut aamma nioqqutissat akii aningaasaateqarfiillu aningaasaliiumassusiat eqqarsaatigalugit, inuiaqatigiinni atukkatigut assigiinngippallaamik atugassaqartitaaneq nutarterlugu naligiinnerusumik nammaqatigiinnerusumillu ingerlaarnissarput pisariaqarpoq. Pissutsit taamaannerisa inuussutissarsiorfiit illoqarfinni isorliunerusuni nunaqarfinnilu ingerlatserusussinnaanerat assut killileqqavaat. Suliassaavoq aaqqitassaq pingaarutilik.

Nunatsinni inuit sulineq anersaaralugu inuuneqarnitta kinguaassatta qanoq inuuneqarnissaminnik kingornussisussatut inuusaaserissavaat. Sulinermik inuussutissarsiuteqarnerup qanoq pingaartiginera nangitsisussanut naqissuserlugu erseqqissaqqittaruk. Kikkut tamarmik sulinermik inuussutissarsiorsinnaanerat periarfissikkumallugu assortuuffinnut ilaanata, ataatsimut angusaqarumaneq timitalerniartarutsigu, siunissaq qaninnerusoq angusaqarnissamut periarfissiisarpugut. Suleqatigiinnerput suli nukittorsagassaavoq.

Inuit Ataqatigiit sinnerlugit Kalaallit Nunaanni sulinermik inuussutissarsiuteqartut ullorsiorneranni tamassi pilluaqquassi.

Aqqaluaq B. Egede

Inuit Ataqatigiinni siulittaasuugallartoq

Inuit Ataqatigiit Kattuffiat

Attavigitigut/kontakt os

Imaneq 2
Telfon: (+299) 329888
Fax: (+299) 323232
Aningaaq: http://ia.gl
Email: ia@ia.gl