Arnaq nukittooq tamatsinnullu maligassiuisuusoq qimaguppoq

Nunarput arnamik malunnaateqarsimanerpaat akornanniittumik annaasaqarpoq. Henriette Rasmussen, Inna, siusippallaarujussuartumik  toqukkut qimaguppoq. Inuit Ataqatigiinni aliasungaarpugut ilaqutaasunullu qamannga pisumit misiginneqatigaavut.

Inuk anersaakkut nukittooq,  inuit pisinnaatitaaffii, nunat inoqqaavisa pisinnaatitaaffii, arnat pisinnaatitaaffii naligiisitaanerlu pillugit suliaqarnermi siuttuusimasoq malunnaatilimmillu sunniuteqarsimasoq eqqissivoq. Henriette Rasmussen ukiuni qulikkaani amerlasuuni politikkikkut, nunat tamalaat akornanni nunatsinnilu suliaqarnermini tamatsinnut maligassiuisuuvoq. Inna qujassutissaqarfigeqaarput.

Henriette Rasmussenip eqqissineranik tusarlerneqarnitsinni sineriak tamakkerlugu ikinngutit suleqatigisimasaalu ikinngummik, suleqammik nukittuumik arnamillu ataqqinassusilimmik annaasaqarlutik kattuffitsinnut  nalunaarsimapput. Innap ataqqinassusaa inoqatiminullu qanilaarnermik tunisisarsimanera ulluni kingullerni malunnarsimaqaaq inuunerminilu  suliarpassuinut sunniuteqarluarsimasunut qujaniarnerput  ilaqutaasunut apuukkumavarput.

Henriette inuusunnerminit Inuusuttut Ataqatigiit Inuit Ataqatigiillu suleqataaffigai annertuumillu Nunarput kommunemut Inatsisartunullu qinikkatut ukiunilu arlalinni naalakkersuisutut sullissimallugu. Isumaginninnermut naalakkersuisutut kingusinnerusukkullu ilinniartitaanermut kulturimullu naalakkersuisutut suliat aallartissimasai suli maannamut sunniuteqarput nutaaliornikkullu maligassiuinera eqqaaneqartariaqarluni.

Nunarput sinnerlugu avammut ilisimasaqarluartumik ataqqinartumillu kinnertuarsimavoq. Politikeriunermi kingorna ILO-p Naalagaaffiit Peqatigiinni allaffeqarfissuani nunat inoqqaavisa pisinnaatitaaffii pillugit sulivoq, nunatsinneersutut siulliulluni ILO-p allaffeqarfiani qaffasissumik atorfeqarnermigut. Kalaallit allat Naalagaaffiit Peqatigiinni atorfinissinnaanerannut aqqutissiuussivoq nunallu tamalaat akornanni arnat nukittuut ilagilluinnagaattut ilisimarisimaneqarluni.

Nunatsinni nunat inoqqaavisa inuillu pisinnaatitaaffii pillugit siuarsaajuarlunilu qaammarsaajuarpoq ingammillu naligiisitaaneq pillugu suliniuteqarnermut tamallu oqartussaaqataaneranni arnat naligiissitaanikkut peqataalluarnissaannut siuttuusimalluni.

Nunat tamalaat akornanni nunat inoqqaavisa pisinnaatitaaffii pillugit suleqataajuarnera kalaallinit, nunat inoqqaavinit allanit nunarsuarmioqatitsinniillu eqqaamaneqartuassaaq. Ingammik naggueqatitsinnut attaveqartuarnera malunniuteqarsimaqaaq Issittumilu suleqatigiinnermut siuarsaaqataajuarsimavoq.

Henriette Rasmussen piffissaq kingulleq tikillugu inuiaqatigiinnik qaammarsaanermik ilisimasanillu apuussinermik ingerlatsivoq. Nunat tamalaat akornanni sulereerluni tusagassiortutullu ilinnarnermigut sulinermigullu inuiaqatigiinnut nukittorsaataasunik nuannaarutaasunillu aallakaatitassiortuarpoq. Arnaavoq nalorninanngisaannartumik kalaallit kulturitsinni Nunatsinnilu tunngavilik. Arnaavorlu nunanut allanut kiinnersinnaasoq, oqaatsinik arlariinnik ilinniagaqarsimalluni nunat tamalaat akornanni suleriaatsinik ilisimasaqarluarnermigut nunarsuarmioqatigiinni suleqataajuarsinnartoq.

Toqussi tikillugu ataqqinaammik Frankrigimut konsuliunermigut tamanna aamma takutippaa.

Henriette Rasmussenip toqukkut qimagunneratigut Nunarput arnamik nukittuumik, inummik isumatuumik nunarsuarmioqataasumik nunatsinnilu inuuniarnikkut naligiinnerulernissamut arnallu angutillu naligiissitaanerulernissaannut aqqutissiussisumik annaasaqarpoq.

Inuit Ataqatigiit Nunatta arnamik nukittuumik maligassiuisuusumillu annaasaqarnera aliasuutigeqaarput. Innap eqqissinerani ilaqutaasut, qitornai, ernutai, aapparisaa, qatanngutai qanigisaalu tamarmik qamannga pisumit misiginneqatigaavut.

Henriette Rasmussenip eqqaaneqarnera ataqqinartuuli.

 

Sara Olsvig

Siulittaasoq, Inuit Ataqatigiit